Elkarrekin jolas egiteko familiei gune bat eskaintzea eta familia desberdinei elkar ezagutzeko aukera ematea nahi dute Arrasaten, Familia Jolasean programarekin. Arrasateko Udalaren Gazteria Sailaren programa da eta Txatxilipurdi elkartearekin batera gauzatzen dute, elkarlanean. Euskararen transmisioari eta aniztasunari garrantzia emanez gurasoen eta seme-alaben arteko harremana era ludikoan gauzatzea dute helburu.

Igandean, urtarrilak 14, eman diote hasiera ikasturte honetako eskaintzari eta harrera beroa egin diete erabiltzaileek; izan ere, familia asko elkartu dira. Aurrerantzean, familiek zabalik aurkituko dituzte Arrasateko Okendo ludotekako ateak domeketan, martxoaren 11ra bitartean, 17:00etatik 19:00etara. Aurreko ikasturteetan zerbitzua hilean behin eman badute ere aurten domeka guztietan emango dute.

Hala, astean zehar eskaintzen den ludoteka zerbitzua aste bukaeretara zabalduko dute. Zerbitzua 0-8 urte arteko haurrei eta beraien familiei dago zuzenduta. Doako zerbitzua da eta ez da aurrez izena eman beharrik izango. Dena den, ekintzak hobeto prestatzeko parte-hartzea aurrez jakinarazteko eskatu dute antolatzaileek.

Txatxilipurdi elkarteko hezitzaile Antton Martinezek azaldu du lehen saioan ipuinak irakurtzeko gunea egokitu zutela txoko batean, harearekin jolas egiteko kutxa ere eskura jarri zietela umeei, eta asko ibili zirela sukaldari lanetan. “Lehenengo aurkeztu egin gara guztiok, elkar ezagutzeko, eta ondoren madalenak egiten hasi gara”.

Gurasoen proposamenak

Martxoaren 11 bitartean domeka arratsalde guztietan izango dira familien zain Okendo ludotekan: “Aurten, gainera, familien parte-hartzea bultzatu gura dugu. Guk hainbat ekintza gertatuko ditugu, baina gurasoengandik datozen proposamenak eskertuko genituzke”.