Optometristak?

Askok ,Opto… zer? erantzuten dute, A! Okulistak! Guk, ez …   A! Betaurrekoak saltzen dituena! Guk, bueno… Ta orduan zer da hori ba? Eta guk pentsatzen dugu, nola azaldu!

Ba beitu, optometristoi begi osasuntsuak aztertzea dagokigu. Hau da, patologiarik egon ezean begi bakoitzak 100%a ikusi beharko  luke, batzuetan betaurreko edo ukipen lenteen erabileraz, baina 100%a.

Badaude kasu batzuk non begiak ezin duen 100%a ikusi (nahiz eta betaurreko edo ukipen lenteak erabili), honi begi alperra (ambliopia) esaten zaio.

Arrazoia? Graduazioa beranduegi ipini delako, patologiaren bat egon delako edota estrabismoa dagoelako (begi okerra), besteak beste. Ambliopia edo begi alperra uste duguna  baino ohikoagoa da.

Optometristok, patologia bat dagoen susmoa badugu, oftalmologora bideratuko dugu . Bestalde,  beharra dagoen kasuetan graduazioa ipintzea oso garrantzitsua da, adin goiztiarretan begia ondo garatu dadin.

Honetaz gain, begiak dituen gaitasunak ondo ez daudenean ikusmen txarra izan dezakegu. Adibidez, garrantzitsuak dira begien mugimenduak, enfokatzeko gaitasuna, konbergentzia eta bi begien arteko elkarlana.

Nola  igarri dezakegu  gaitasun hauek ondo ez daudela garatuta?

Buruko mina edo begi gorriak eguneko azken orduetan edota  gertuko zereginetan denbora luzez egon ostean. Sintoma hauek  helduotan errez identifikatzen dira, baina  nola igarri umeen kasuan? Hauek,  ez dakite esaten noiz duten buruko mina, edo  ez dira konturatzen gaizki ikusten dutela, ez baitakite hobeto ikusi dezaketela.

Kasu hauetan beraiekin denbora gehien egoten garenok (guraso, hezitzaile …) keinu edota sintometan jarri behar dugu arreta

Izan daiteke hasierako adinetan gertuko zereginak baztertzea, margotzea adibidez.

Asko eta asko etortzen dira irakurketa maila  dagokiena  baino baxuagoa dutelako, eta nahiz eta irakurketa landu, ez dutelako maila hobetzen.

Zer arazo izan dezake  ondo irakurtzen ez duen haur  batek?

Begien mugimendu desegokiak, fokatze arazo bat  edota bi begiak elkarrekin ondo ez koordinatzea .

Izan ahal da haurrak atzamarra erabiltzea lerrotik lerrora joan eta   ez galtzeko, hitzak   asmatzea (batez ere hitzen bukaera), hitzen  ordena aldatzea, inbertsioak egitea (b eta d, al eta la), letren edo zenbakien ezagupena kostatzea, gertuko zereginak baztertzea, burua asko hurbiltzea gertuko zereginetan edo telebista ikustean, idatzi edo marrazterakoan konturatu gabe esku batekin begi bat tapatzea, ezinegona eserita egotean, gorputzeko postura desegokiak,  orrian ordena mantentzeko ezina, kiroletan traketsa izatea, etab..

Agian irakurtzen ari zaren horrek galdetuko zenion zure buruari zergatik azken hauek, ezta?

Ba begiak gorputz batean daudelako eta bat egiten dutelako. Ikusmena  eta garuna batera garatzen dira, mugimenduak ematen duten ikas prozesu baten bitartez. Guk haurren ikusmena, gorputzak nola funtzionatzen duen, eta nola dagoen lateralizatua aztertzen dugu.

Honen harira, gehienok dakigu umeak jaiotzean ez duela  ondo ikusten. Momentu horretan amaren edota gertukoaren babesa eta elikadura dira bere behar garrantzitsuenak. Geroago umea mugimenduan hasiko da, arrastaka, katamar ibili … modu honetan gaitasun asko barneratuko ditu, baita euren ikusmena ere, dena lotuta dago eta!

Eta arazorik badago zer gin dezakegu? Lanketa baten bitartez gauza asko lor daitezke, konexio berriak sortu eta ikusmenean zein gorputzean patroi berriak sortu.

Hortaz, badakizue, argi egon behar dugu antzeman ditzakegun sintomekin, konponbidea badute eta!

Ainhoa Barrenetxearekin hitz egin dugu idatzi hau oinarri hartuta.