Galdakao-Usansolo Ospitalean zabalduko du Eusko Jaurlaritzak Euskal Autonomia Erkidegoko lehenengo esne bankua. Aurreikuspena da urte honetako azken hiruhilekoan jartzea martxan eta 70.000 euroko inbertsioa egingo dute. 

Banku hori Galdakao-Usansolo Ospitaleko Transfusio eta Giza Ehunen Euskal Zentroan kokatuko dute, eta premiaren arabera, Neonatologiako Unitatea duten Osakidetzako lau ospitaleak hornituko ditu: Arabako Unibertsitate Ospitalea (egoitza Txagorritxun), Gurutzetako Unibertsitate Ospitalea, Basurtoko Unibertsitate Ospitalea eta Donostiako Unibertsitate Ospitalea.

Amen esnea bilduko dute bertan eta Eusko Jaurlaritzatik aditzera emandakoaren arabera “nutrizio eta tratamendu egokiak emango zaizkie 32 aste baino gutxiagorekin jaiotako haurrei edo 1.500 gramo baino gutxiagorekin jaiotakoei amek ezin dietenean behar adina esne eman edo Neonatologiako medikuek adierazten duten kasu espezifikoetan —gaixotasun kirurgiko abdominala, kardiopatiak eta bestelako gaixotasun arriskutsuak—”. Une honetan Euskadin jaiotzen diren hamar haurretatik bat jaiotzen da denbora bete aurretik, eta horien %15 dira jaiotzean 1.500 gramo baino gutxiago pisatzen dutenak jaiotzean. —2015eko datuak—. 

Nola funtzionatuko du esne bankuak?

Esne-emaileek etxean izoztu ahal izango dute esnea eta hamabostean behin gertuko osasun zentrora eraman beharko dute. Handik Galdakaoko Ospitaleko bankura eramango dute, norbaitek horren beharra izan arte.

Esne bankuaren sorrera aldarrikatzeko iaz 16.000 sinaduratik gora bildu ziren change.org plataforman. Gurutzetako Ospitalean jartzekoa zen eskaria, baina transfusio eta giza ehunen zentroa Galdakaoko Ospitalean dagoenez, bertan kokatzea adostu du Eusko Jaurlaritzak.

Albistearen iturria irekia.euskadi.eus eta geuria.eus