Batzuk lehenago eta beste batzuk beranduago, baina askok ditugu gertu udako oporrak. Aukera ederra dira denbora gehiago hartzeko seme-alabekin jolasean egiteko. Consumer aldizkarian irakurri dugu oporrak sasoi aproposa direla gozamen kreatiboarentzat eta originalarentzat, eta horrekin batera txerto eta erremedio ezin hobea estresarentzat eta eguneroko bizitzako monotoniarentzat.

Argi dago benetan gozatzeko barne-jarrera jakin bat eduki beharra dagoela. Jolaserako, bestalde, ez da jostailu konplexurik eta garestirik behar. Aski izaten da askotan makila bat, soka bat edo kartoizko kaxa bat. Han eta hemen aurkitutako zenbait ideia ematen ditugu hemen.  Behar beharrezkoa direnak gogoa, irudimena eta askatasuna dira. 

Sormenaren ordua

Adituek gomendatzen dute egunero hartu behar dela seme-alabekin jolasean egiteko tartea. Luzeagoa edo motzagoa baina egunero hartzeko aholkua ematen dute. Elkarrenganako loturak eta konplizitatea sendotzen lagunduko du. Gainera, helduak umearekin jolas tartea konpartitzen duenean umeak ulertzen du helduak garrantzia aitortzen diola.

Argi izan behar dugu helburua elkarrekin ondo pasatzea dela, eta ez nola jolastu erakustea edo haurraren jolas moldeak zuzentzea. Umearekin egiten dugun guztia irakaskuntzara bideratzen badugu umeak ez du jolasean egiteko sentsazioa izango. Ariketa bat izango da harentzako eta gozamena, horrela, ez da berdina.

Utzi umeari gidari lanak egiten. Gogoan hartu esparru bakarra dela non erabakiak har ditzakeen, eta erabakiak hartzen dituenean harro sentitzen da, auto-estimua lantzen du. Helduak egin ditzake proposamen batzuk, baina erabakia umearena izan behar da.

Elkar ezagutzen

Elkarrekin jolasteak aukera emango dizue elkar hobeto ezagutzeko. Umeak ikusiko du heldua ‘serio’ paperetik kanpo eta konturatuko da gai dela ideia dibertigarriak izateko, eta proposamen bikainak egiteko. Helduak, berriz, ikusiko du umeak jolasa nola antolatzen duen, ze iniziatiba hartzen dituen, bere erreakzioak, tematia den edo ez, irudimen gaitasuna… Beraz, aurrera lotsarik gabe!

 

[ngg_images source=”galleries” container_ids=”4″ display_type=”photocrati-nextgen_basic_thumbnails” override_thumbnail_settings=”0″ thumbnail_width=”120″ thumbnail_height=”90″ thumbnail_crop=”1″ images_per_page=”20″ number_of_columns=”0″ ajax_pagination=”0″ show_all_in_lightbox=”0″ use_imagebrowser_effect=”0″ show_slideshow_link=”1″ slideshow_link_text=”[Show slideshow]” order_by=”sortorder” order_direction=”ASC” returns=”included” maximum_entity_count=”500″]
Argazkien iturria: Naran Xadul