Hasi aurretik azpimarratu nahi nuke kontu honetan zalantzak eta galderak ditudala erantzunak baino gehiago eta lerro hauek idaztearen arrazoia ez dela honetatik ikastea besterik. Hau esanda, eta hitz hauek irakurri ondoren norbanako oro bere hausnarketa elkarbanatzera animatuta, has nadin.

Ez da berria gizon emakume genero sistema binario hori irudikatzen duten irudien aurkako salaketa. Gerturatu izan gara sarri komunen batera eta ate banatan sinbolo bi ikusi, edo joan supermerkatura eta era askotako jostailuak bi koloreko sistemaren arabera sailkatuta topatu, edo… Hauei gehitzen zaizkien gainerako argudioetan sartu gabe, irudigile bezala bizi izan ditudan egoera paradoxiko batzuk atera nahi nituzke mahai gainera.

“Eñaut, zergatik ez duzu harako irudi hartan emakumerik marraztu?”, “Zergatik dira denak gizonak?” edo “Zergatik dago irudi horretan mutil bat soilik?”. Zur eta lur gelditu izan naiz holakoetan. “Aiba, nik marraztu ditu bada emakumeak…”.

Argi daukat gai honen eta orokorrean feminismoaren inguruan formakuntza etengabea behar-beharrezkoa dudala eta sarri pentsatu izan dut horretan ere atzera gelditzen nabilela. Saiatuko naiz buelta ematen.

Baina aizue, nola marrazten da oraindik bularrak garatu ez zaizkion neska ile laburdun bat? Gona bat jantzita? Gabardina arrosa soinean duela? Belarritakoak marraztuz? Eta emakume nagusiagoen kasuan ere izan liteke bada bularrak horren nabarmenak ez izatea, aldaka estuak edukitzea edo jertse zabal bat jantzita eramatea, ez?

Forma eta kolore askotako gorputz anitzak daude munduan eta horiek bi multzotan banatzen saiatzean gara oraindik ere komunetarako ilaratan legez. Alde batera gonadun izaki arrosak, bestera prakadun urdinak. Ez al genuke gure iruditegi mentala aldatzeko ahalegintxo bat egin behar genitalik marraztu ez zaion ilustrazio bateko pertsonaia horri genero identitate bat ezarri baino lehen?

Galderak erantzunak baino gehiago… zuen ekarpenetatik ikasteko gogotsu!