Pantailei buruz asko hitz egiten da eta kezka eta buruhauste handiak izaten dituzte guraso askok, hauen inguruan erabakiak hartu behar dituztenean. Ezin dugu ukatu informazio eta komunikaziorako teknologiek duten inpaktua eta indarra, aldiz, haur eta nerabeen kasuan bideo-jokoak eta sare-sozial digitalak izaten dira kezka gehien sortarazten dutenak. Sarritan, baliabide gutxirekin topatzen gara testuinguru honi aurre egiteko.

Baina, nola lagundu ahal diet ibilbide honetan alaba-semeei?

Lehenik eta behin, argi izan beharko genuke hezkuntzan ez dagoela formula magikorik, baina aldi berean, arlo honetan ongizatea bermatzeko kontuan hartu behar diren faktore eta pausuak definitzea daukagu. Ondoren fijatu gaitezkeen elementu batzuk:

  • Erreferenteak. Bai bideo-jokoetan, bai sare-sozialetan guretzako ezezagunak izan daitezkeen pertsonak eta pertsonaiak egon daitezke. Galduta bagaude, haiei galdetu zerk deitzen dien arreta eta zergatik gustuko dituzten, horrela, haien hizkuntzara modu errazagoan hurbilduko gara eta elkarrizketak mamitsuagoak izan daitezke.
  • Azalpenak, arreta eta emozioen erregulazioa. Haurren neokortexa ez dago garatuta, beraz, arrazoitzen saiatzen garenean agian ez digute kasurik egiten edo ematen ditugun azalpenak eta arrazoiak ez dituzte ulertzen. Denbora beharko dute, garatzeko denbora, hain zuzen ere.
  • Komunikazioa eta konfiantza. Alaba-semeengan eragina dituzten faktoreak guztiz identifikatuta izatea ezinezkoa izango da, baina komunikazioa txikitatik lantzen badugu errazagoa izango da haiekin komunikatzea eta noski, konfiantza garatzea.
  • Kontrola eta gainbegiratzea. Askotan kezka honekin topatzen gara eta ez dakigu zein puntutaraino beharrezkoa den pantailekin egiten duten guztia jakin behar dugun ala ez. Alde batetik, haiengan konfiantza ezartzen badugu eta mugak pixkanaka pixkanaka jartzen joan bagara, errazagoa izango da haiek haien ibilbidea egitea. Bestetik, erabiltzen dizuten sare-sozial digitalak eta bideo-jokoak askotan adin muga bat dute eta horretan fijatzea daukagu ere. Azken hau ez da inoiz nahikoa izango, pistarik handienetako bat haien emozioek luzatuko digute.
  • Denbora. Haiek ohitura osasungarriak har dezaten, pantailekin igarotzen duten denbora mugatzea ezinbestekoa izango da eta hauxe prozesu bat izango da. Prozesu honetan, mugak aldakorrak izan daitezke: adinaren arabera, gure behar izanen arabera edota haur edo nerabearen heldutasun maila kontutan hartuta.
  • Pribatutasuna eta intimitatea. Gure intimitatea eta haiena babestu nahi badugu puntu batzuk kontutan hartzea interesgarria izan daiteke. Esate baterako: mugikorrak utzi edo ez, nola eta zein momentutan begiratuko dugun haiek pantailekin egiten dutena, (aurrez adostea komeni da) edo zein momentuetan eta noren aurrean erabiliko ditugun ere.