Gure kanpoko irudia ispiluetan ikusten dugu baita besteen erantzunek proiektatzen dizkiguten irudiekin ere. Besteetatik jasotzen dugun gurekiko ikuspegia atsegina, gatazkatsua… izan daiteke. Panpinetan jolastu beharrean akzioa duten ekintzak gustatzen bazaizkigu “Marimutil halakoa!” entzungo dugu agian. Ule motza eta txandalak eramaten duen neskato bat bagara akaso behin baino gehiagotan “Zeinen mutil polita!” aditu dezakegu. Egoera hauek, eta beste askok, mingarriak, nekagarriak eta bortitzak suertatu daitezke. Oroitzen al duzu txikitan edo gaur egun mina eman dizun halako esaldi, jarrera edo begiradarik? Edo, antzeko egoera bat ikusi baduzu, zein erantzun izan duzu? Askotan, egoera horietan botere harreman bat ematen da, adinagatik, generoagatik, klaseagatik, arrazagatik, jatorri sozial edo kulturalagatik… bestearekiko botere egoeran dagoen pertsonak/kolektiboak izugarrizko kaltea eragin dezake. 

Ezin ditugu halako egoerak ekidin baina eraldaketarako eremu lagunkoiak sortu nahiko genituzke. Testuinguru honetan, Haziak egitasmotik Ispiluak ipuin ilustratua sortu dugu. Ekhine protagonista duen ipuinak, onarpena, epaiketa, eta generoaren inguruan hausnartzeko euskaraz sortutako hazi txikia izateko asmoa du.  Garrantzitsua iruditzen zaigu horrelako gaiak lagun artean, ikastetxeetan, familian… hitz egiteko aukerak izatea. Mimo eta errespetu osoz zaindu eta sortutako testu eta ilustrazioek osatzen dute ipuina. 

Begirada arin batean haurrekin aritzeko materiala dela ondorioztatu daiteke eta hemen ere, islada azkarra gainditu eta ipuinak ematen dituen aukerak bizitzera animatzen zaituztegu, izan ere, egunerokotasunean denok baitugu gaiaren inguruan zer pentsatua, esana eta hausnartua. 

Ispiluak geruza ugari dituen lana da eta norberak behar duena ikusiko du bertan. Abiapuntu anitz horrek elkarrizketarako aukera ematea espero dugu, aurrean dugun papera gainditu eta gure munduetan arakatzeko aukera. Eraldaketa orain eraikitzen da, gure txikitasunetik ere sorburua izan gaitezke.

Nor gara, nork egiten gaitu nor?


Informazioa gehigarria. Ispiluak ipuina hemen 1545 argitaletxeko webgunetik lortu daiteke eta online ere irakurtzeko aukera dago.