Virginia Espin: “Ez dago guraso perfekturik, ez dakigu ondo edo gaizki egiten ari garen”

Gurasoentzako coaching tailerrak egiten ditu Gasteizko Norgara zentroko zuzendari Virgini Espin terapeutak. Terapeuta gestaltikoa, coach-a eta psikologoa da. Uste du guraso rola hobetuz seme-alaben garapen egokiagoa lor daitekeela. Kontzientziazioa bultzatzen saiatzen da, bizitzan gurasoen eta haurren arteko harremana hobetzeko asmoz.

Zer da guraso coaching-a?
Guraso coaching-a diziplina bat da. Hainbat arlotan lantzen da coaching-a: arlo pertsonalean, hezkuntzan, enpresetan… Pertsonen gaitasun guztiak azaleratzen laguntzen du coach-ak,  edo entrenatzaileak, eta gurasoentzat  prestatutako saioetan, beraien seme-alabei modu egokienean garatzen laguntzen diegu.

Zer lantzen duzue tailerretan?
Bi puntutan zentratzen gara: gurasoengan kontzientzia aplikatzen eta seme-alabei laguntzeko coach bat garatzen. Esaterako, etxean nolako espazioa sortzen ari garen, seme-alabei jartzen dizkiegun arauak, lengoaia nola erabiltzen dugun… halakoen gainean erreflexionatzen dugu. Hauen inguruan zer aldatu, zer bultzatu behar den… ikusten dugu.

Beharrezkoa da?
Ez dago guraso perfekturik. Ez dakigu ondo edo gaizki egiten ari garen, eta, askotan, laguntza behar izaten da. Guraso izatea arte bat da, umeak hezteko ez dago errezetarik.

Zer da garrantzitsuena?
Autonomia eta kontrola eman behar zaie seme-alabei, baina horren oreka mantentzean dago gakoa. Gurasoen arteko partekatzea; egunerokotasunean dituzten zailtasun, erronka… beraien errealitatera eramanez hausnartzeko espazio bat sortzen dugu, gu bidelagun izanik.