Oihartzun handia izan du sare sozialetan Jose Alberto Gutierrez kolonbiarraren ekimenak. Bogota herriko La Nueva Gloria auzoan bizi da eta kale-garbitzailea da. Lan orduetan zabor edukiontzietan aurkitzen dituen liburuak gordetzen ditu, eta etxekoen laguntzarekin konpondu ostean etxeko lehenengo solairuan zabalduta daukaten liburutegi zerbitzura gehitzen ditu.

Boluntarioak behar dituzte beste zenbait auzotan liburutegi berriak zabaltzeko eta deialdia egin dute. Ekimenaren nondik norakoak ikusita gurean jasotzea egoki ikusi dugu auzolanak, birziklapenak eta lan boluntarioak emaitza interesgarri ugari eman ditzakete-eta. 

Zortzi urte martxan

Zortzi urte dira Gutierrezek lehenengo liburutegia zabaldu zuela bere etxeko lehenengo solairuan. Etxekoak —emaztea eta hiru seme-alaba— eta boluntario talde baten gehitu zaizkio proiektura.

Denbora horretan zabor edukiontzietan aurkitutako milaka liburu gorde eta konpondu ditu. Dohaintzak ere jaso ditu. Gaur egun 10.000 liburu hartzen ditu liburutegiak. Eta irakurketa, sorkuntza, txotxongilo, musika, antzerki, informatika edo etxeko lanak egiteko tailerrak ere eskaintzen dituzte.

Kontuan hartuta auzoa Bogota herriko txiroenetakoa dela zerbitzuak berebiziko garrantzia du neska-mutikoen formazioan. Entretenimendurako zein formaziorako espazio seguruak dira umeentzako. Astean ehun bat neska-mutiko jasotzen dituzte liburutegian.

Liburutegi gehiago posible

Liburu asko elkartu dituzte La Fuerza de la Palabra fundazioko kideek eta inguruko beste auzo txiroetan liburutegi berriak zabaltzeko aukera ikusten dute. Kokapena eta kudeatzaile boluntarioak behar dituzte, eta horiek eskatzeko egin dute egunotan sare sozialetan hain entzutetsua egin den kanpaina.

Berez, hasi dute zabalkundea. Orain urtebete zabaldu zituzten beste lau liburutegi: Ciudad Londres (La Nueva Gloria auzoan), eta Las Auras, El Raizal eta Las Animas Sumapaz izeneko nekazari auzoan.

Informazio gehiago eta argazkiaren iturria hemen.