Euskadiko Kide Ugariko Familien Federazioa da Hirukide eta hainbat zerbitzu eta jarduera eskaintzen ditu familia ugariak direnentzako edo izateko bidean daudenentzako. Kolektiboak dituen laguntza eta hobari publikoei buruzko informazioa ere ematen dute.

Azken urteko berritasunak familia ugarientzat

Hirukidetik jakinarazi dute azken hilabeteotan zenbait aldaketa eman direla eta familia ugari askok ez dituztela ezagutzen. Besteak beste, nabarmendu dituzte garrantzitsuak direlako:

 

. Pasaportea eta NANa egiteko tasen salbuespena

Iaztik kide ugariko familiako kideek doan egin dezakete NANa edo pasaportea. Hala, ez dituzte  ordaindu behar agiri ofizial horiek izapidetzeko tasak.

. Kide ugariko familia izaeraren hedapena

Iaztik indarrean dago kide ugariko familia izaeraren legezko hedapena. Hala, familia horiek titulu hori izaten jarraituko dute seme edo alaba gazteenak legeak ezarritako adina bete arte: 21 urte edo 26 urte ikasten edo prestatzen jarraituz gero). Adin horretatik gorako seme-alabak titulutik at gelditzen joango dira, baina familiako gainerako kideen kasuan familia ugari izaten jarraituko dute gazteenak legezko adin hori bete arte.

. Argiaren Bonu Soziala

“Urtebete baino gehiagoan Industria Ministerioarekin etengabeko bilerak egin eta proposamenak azaldu ondoren, argindarraren bonu soziala garatzen duen Errege Dekretua behin betiko onartu zain gaude; dekretu horren arabera, familia ugariek % 25eko deskontua izango dute”.  Bonu sozialaren arauketa berrian hobaria jaso ahal izateko kontsumo-mugak ezarri dira; urtean 3.600 kWh arte. Beraz, bonuaren % 25eko deskontua gehieneko kontsumo horretara bitartean aplikatuko da; hortik aurrera (3.600 kWh urtean familia ugarien kasuan) tarifa arruntaz fakturatuko litzateke.

. Amatasunagatiko osagarria pentsioetan

Era berean, iaz sartu zen indarrean amatasunagatiko osagarria gutxienez bi seme-alaba izan dituzten emakume langileen kontribuzio-pentsioetan. % 5 handituko da, bi seme-alaba izan dituztenentzat; % 10 hiru izan dituztenentzat; eta % 15 berriz erretiroa hartu eta lau seme-alaba edo gehiago izan dituztenentzat.