Neska-mutiko batzuk gurasoengandik entzun behar izaten dituztenek zer pentsatu ematen dute, eta gaiarekin sentsibilizatuta kontzientziazio kanpaina berezia egingo dute laster Frantzian. Gaiarekin lotuta publiko zabalari zuzenduta lehenengo sentsibilizazio kanpaina izango da.

Beti izan zara zure anaia baino motelagoa! / Ez zara oso azkarra! / Ikusi ditut zu baino trebeagoak! / Alperrik da zuri ezer esatea! / Jakin izan banu ez nuen umerik egingo! / Beti zara azkena!… Irailean aurkeztu zuen Gilles Lazimi sendagileak ahozko gogorkerien ondorioez ohartarazteko ikus-entzunezko laburra. Min egiten duten hitzak edo Les mots qui blessent du izenburua. Bertan, hainbat pertsona nagusi agertzen dira esaldi bortitzak esaten edo gogoratzen. Haurtzaroan beraiei esandakoak dira gehienak.

Ikus-entzunezkoa ikusgai dago Interneten —frantsesez— eta laster hasiko dira bestelako euskarrietan ematen, telebistan kasu. Helburua da gurasoei ikusaraztea zenbateko sufrimendua eragin daitekeen antzerako hitz bortitzak erabilita. “Ez dugu gai horren inguruan askotan hitz egiten, baina garrasi zein burla egiteak eragina izan dezake haur baten garapenean. Gurasoak horren inguruan sentsibilizatu nahi ditugu. Erabiltzen dituzten hitzen nolakotasunarekin ohartu behar dira. Hausnarketa bultzatu gura dugu. Asmoa ez da erruduntasuna sentimendua sortzea. Gaur egun gurasoen %90 asmo onekoak dira, baina guztiek dute zer hobetu. Jakin behar dute hitzez ere min egin dezakegula eta hitz mingarriak ez dira batere lagungarriak handitzeko”, azaldu du Lazimik.

Sendagileak dio denok ditugula gogoan txikitan entzundako hitz mingarriak. Guri zuzendutako hitz mingarriak. Argi dauka handitzeko neska-mutikoek laguntza, maitasuna eta asmo oneko esku-hartzeak behar dituztela, batez ere gertuen dituzten horiengandik. “Hitz mingarriek estresa edo beldurra moduko ondorio fisikoak eragiten dituzte. Esaldi batek —batez ere behin eta berriz errepikatzen badugu— larritasuna eragiten du, eta poliki-poliki haurrak egia bailitzan onartuko du. Horrek auto-estimuan eragingo dio”. Lazimik gehiago dio: “Haur bati makurkeriak esateak kaltetu egingo du bere auto-estimua eta baita ere gurekin duen harremana. Haurra hitzez mintzerakoan bestelako bortizkeriak eragiten ditugu”.

Frantziarrak ziurtatzen du haurrak heztea ez dela erraza. “Ez digu inork erakutsi, baina helduak gu gara. Lehenengo umearen lekuan jarri behar dugu beti. Zergatik esaten dizkiogu ume bati nagusi bati esango ez genizkionak? Denbora hartu behar dugu gauzak beste modu batera esateko. Matematikako ariketak egin ezinik dabilen ume bati Zu baboa zara! esateak ez dio batere lagunduko. Kontrakoa”.

Albistearen eta irudiaren iturria —frantsesez– hemen.