‘Adi lagun!’ proiektua aurkeztu dute Oñatiko Elkar Heziko irakasleek eta familiek. Biolentziaren aurkako heziketa bultzatu nahi duen ekimena da. Biolentzia 0, 0 urtetik da proiektuaren ardatza eta helburu hori artearen eta sormenaren bitartez landu dute. Hori horrela, lau mural erraldoi egin dituzte; horiek eskolan ipini dituzte denek ikus ditzaten.

Hiru eragileren artean bideratu dute ekintza: Elkar Hezi ikastetxea, Setem gobernuz kanpoko erakundea eta Eider Eibar margolaria. Hamabi taldetan banatuta ikastetxeko lehen hezkuntzako ikasle guztiek hartu dute parte lanketa horretan.

Lehenengo egitekoa pertsonaiak sortzea izan zen. Irudimena landu dute ikasleek eta horrekin batera jazarpen egoeren inguruko gogoeta eta iritzi trukaketa egin dituzte. Lanketa horri ematen diote balioa ikastetxeko arduradunek.

Ikasleekin batera familiek ere aukera izan dute ekimenean parte hartzeko. 30 bat lagunek hartu dute parte prozesuan izan guraso, aiton-amon edo zaintzaile. Neska-mutikoentzako esperientzia polita izan da.

Argazki galeria hemen (Iturria: Goiena.eus)