Hirugarren ikasturtea da Aramaioko Herri Curriculuma (AHC) lantzen hasi zirenetik. Udala, San Martin Eskola eta Guraso Elkartea dira ekimen horretan parte hartzen ari diren eragileak, interesa erakutsi duten beste hainbat herritarrekin batera. Ondorengo galderari erantzutea da AHCren helburua: Zer jakin beharko luke 12 urteko aramaioar batek Aramaiori buruz? Proiektu hori gauzatzeak Aramaioko herriarentzat garrantzi handia daukala nabarmendu dute.

Galdera hori oinarritzat hartuta, arlo desberdinak izango dituen dokumentua garatzen ari dira –Aramaioren historia, kultura, tradizioak, balioak, jarrerak, nekazaritza eta abeltzaintza moduak, eta abar–. “Nolabait da herria eskolan sartzea eta eskola herrira ateratzea”, azaldu du Mari Karmen Garridok, San Martin eskolako ikasketaburu eta AHCko kideak.

Orioko Herri Curriculuma hartu dute erreferentzia moduan Aramaiokoa garatzeko. Hala ere, alderantzizko bidea erabiliz. “Orion alde tekniko guztia aztertu ondoren garatu zuten sekuentzia didaktikoa. Guk, berriz, lehenengo, sekuentzia didaktikoa egin dugu, eta orain, apurkaapurka gaineko aterki hori guztiori diseinatzen joan gura dugu”, adierazi du AHCko kide Iker Elexpuruk.

Dagoeneko garatu dute sekuentzia didaktiko bat eskolan, Aramaioko elikadura iraunkorraren gainekoa, hain zuzen, eta, pixkanaka, geroz eta gehiago garatzen joango dira. “Urteak aurrera joan ahala, informazio hori guztiori dokumentatuta eta jasota geratzen bada, kanpoko irakasle batek bertara jo ahal izango du edozein zalantza argitzeko eta ikasleei behar duten informazioa modu egokian emateko”, dio Itziar Blazquezek, AHCko beste kide batek. Sekuentzia horiek irekiak izan daitezela nahi dute: “Sekuentzia itxiek ez dute zentzurik eta beste herri batzuetan frogatu da ez direla erabilgarriak”.

Herritarren testigantzak

Herri Curriculuma garatzen joateko, beste esparru garrantzitsu bat adinean aurrera doazen horien testigantzak jasotzea da, eta izango da. “Herritarrek egin ditzaketen ekarpen guztiak dokumentu batean jaso gurako genituzke –herriaren historia, tradizioa eta ohitura zaharrak, adibidez–, bai grabazio bidez, baita idatziz ere, etorkizun batean testigantza horien beharra izanez gero kontsultatu ahal izateko”, azpimarratu du Elexpuruk.

Garrantzitsua herriarentzat

Proiektu hori gauzatzeak Aramaioko herriarentzat garrantzi handia daukala nabarmendu dute. “Askotan, eskola arautuetan garrantzitsuak diren beste gauza asko erakusten dira, baina bertakoa dena ez. Beraz, ahozko transmisioaren eten hori gainditzeko eta herritarrok Aramaioren garrantziaz jabetzeko tresna interesgarria da AHC”, dio Lierni Altuna alkateak. Bestalde, Asier Agirre nekazariak derrigorrezko pausotzat dauka proiektu honen garatzea. “Eskolan ez da ikasten eguneroko bizitzan herrian daukaguna, egiten duguna, nondik bizi garen, eta abar. Alde horretatik, beharrezkoa da eskola mailan gauza hauek irakastea”, dio. Bestalde, Larraitz Arriolabengoa musika irakasleak kultura arloan jarri nahi izan du arreta: “Aramaiok bertso eta musika munduan izan duen afizioa eta emankortasuna azpimarratzekoa da, eta hori umeei azaldu egin behar zaie”.

Dokumentala eta sekuentzia didaktikoa

Aramaioko Herri Curriculumaren garapenean ezinbestekoa izan da bi ikaslek emandako laguntza. Izan ere, batetik, Asier Errasti donostiarrak, Ikus-entzunezko Ikasketen Gradu Bukaerako Lan gisa, Aramaioko Herri Curriculumaren gaineko dokumentala sortu du, hainbat sektoretako herritarren testigantzak batzen dituena. Eta, bestetik, Leire Fernandez arrasatearrak, hezkuntza arloko ikasketak egiten ari dela aprobetxatuta, Aramaioko ondarearen transmisioa gelara eramateko sekuentzia didaktiko bat sortu du, proiektu gisa. Bost urteko haurrentzako prestatu du sekuentzia didaktikoa eta elikadura jasangarria eta Aramaioko baserri mundua izan dira ardatza.

Egunerokoan landuz

Sekuentzia didaktiko hori proba pilotu moduan erabili da, baina, Saioa Uriarte irakasleak azaldu duenez, etengabe ari dira Aramaioko gaiak lantzen, hainbat proiekturen bidez. “Irakasleok kontuan hartzen dugu Aramaiok zer eskaintzen digun, eta edozein gai erabili daiteke Aramaiori buruz gehiago ikasteko. Gainera, gaia edozein dela ere, umeek beti dute interesa, eta galdetzen dute: “Eta Aramaion zer?”. Eta ez bada hala, irakasleak galdetzen du eta gaia Aramaiora bideratzen du. Umeentzako interesgarrienak euren herriko gauzak dira. Harritzen dira, kezkatzen dira, interesa erakusten dute”, dio.

Uriarteren iritziz, modu naturalean egin beharreko gauza bat da. “Umeek ez dakite zer den Herri Curriculuma, eta hori ere bada helburua, naturaltasunez egunerokoan Aramaiori buruz gehiago ikastea, Herri Curriculuma lantzen ari direla jakin gabe. Berez dute herriko gaien gaineko interesa, eta hori bultzatu nahi dugu, hain zuzen. Oraingoz, gustura gaude emaitzarekin, eta hala jarraitzea espero dugu”.