Gurasoen eta haien seme-alaben hizkuntza ohituretan eragiteko orain hiru bat urte jarri zuten martxan Parkelagun programa, Iruñerrian. Mintzakide egitasmotik sortua, antzerako helburuak ditu eta horiei gehitu behar zaie haurrengan eragiteko aukera.

Pablo Kormenzana da egitasmoaren koordinatzailea: “Gurasoek eskatuta sortu genuen Parkelagun programa, proba pilotu moduan. Gerora, zabaldu egin da, esaterako, Sarrigurenera, Atarrabiara… eta beste zenbait herrietara hemen Iruñerrian; izan ere, nahiko arrakastatsua izan da egin dugun tokietan. Herri bakoitzean hogei bat laguneko taldeak egongo dira. Guztira, ehun bat guraso ibiliko dira programa honen bueltan”.

Kormenzanaren esanetan hasieran guraso gutxi batzuk eman zuten izena eta kopurua handituz doa urtez urte. Izen-ematea urte osoan dago zabalik.

“Etxeko hizkuntza ohituretan eragiteko asmoarekin sortu genuen Parkelagun programa”, dio koordinatzaileak. “Mintzakide egitasmoaren aldaera hori dauka. Umeengan eragitea ere bada helburua. Taldeak —gurasoak eta seme-alabak— astean behin elkartzen dira parkean ordu eta erdi inguruko saioa egiteko. Horrekin batera, hilean behin-edo jarduera osagarri bat antolatzen dugu. Tailerrak izan ohi dira. Azkenean, astean zehar elkartzen diren umeek ere beraien kuadrilla osatzen dute eta eraginkorra da; izan ere, taldeak auzoka edo herrika osatzen saiatzen gara eta azkenean zonaldeko haurrak izaten dira. Parkelagun saioetatik harantzago elkartzen dira bestela ere”.

Talde bakoitza parke-laguntzaile batez —euskaraz jariotasunez hitz egiten du— eta hainbat mintzakidez —euskara hobetu nahi dute— osatzen da. Talde txikiak izan ohi dira, sei edo zazpi lagunekoak. “Zaintzen dugun kontu bat da izateko guraso guztiek tartetxo bat hitz egiteko eta euskara lantzeko benetan”.

Gurasoak lehentasunezko kolektiboa

“Gurasoak lehentasun taldea da euskararen transmisioari begira”, azaltzen du Kormenzanak. “Uste dugu garrantzitsua dela lanketa berezia egitea. Gure zonaldean euskara badoa poliki-poliki aurrera, baina gertatzen da hitz egiten dakiten guraso askok ez dutela hitz egiten. Parkeetan entzuten da nola umeekin euskaraz hitz egiten duten gurasoek, baina gero helduen artean gaztelerarako joera dago”.

 

 

 

 

 

 

 

 

 

 

 

 

 

Argazkiak: Iruñerriko mintzakide egitasmoa.