Herriko hiru ikastetxeek osatuko dute elkartea, eta bidelagun izango dituzte Udala eta Aloña Mendi kirol elkartea. Ikasleen heziketa osoa sustatzea eta kirol modalitate ezberdinak ezagutaraztea dute helburu.

Eskola kirola sustatu eta kudeatuko duen elkartea eratu dute herriko hiru ikastetxeek: Oñatiko Eskola Kirola eta Hezkuntza Elkartea, hain zuzen. Oñatin eskola adinean dauden ikasleen heziketa integrala lortzeko eskola kiroleko egitura bat sustatzea du helburu nagusia.

Eskola kirolak 45 urteko ibilbidea du Oñatin, eta alkateak azaldu du “hezkuntza ikuspegitik garrantzi handia” duen egitasmoa dela. Hori horrela, Oñatiko Udalak kirol plana landu du Kirol Managment enpresarekin, eta, tartean, eskola kirola ere landu dute. Emaitzetan ikusi dute hainbat indargune dituela eskola kirolak herrian: ikasleen %81eko parte-hartzea eta nesken presentzia handia. Ahuleziak ere baditu: batez ere, aste barruko eta aste bukaerako saioen arteko loturarik eza.

Kirol proiektua

Eskainiko duten kirol programa 2018-2019 ikasturtean jarriko dute martxan. Aldaketa nagusia Lehen Hezkuntzako hirugarren eta laugarren mailetan egongo da. “1+1 eskaintza izango dute; hau da, astegunetan saio bat eta asteburuan beste bat”, adierazi du Elkar Heziko Koordinatzaile Ismael Zubiak. Modu horretan, aste barruko eta aste bukaerako saioen arteko lotura bermatuko dute.

HH-5 mailan psikomotrizitate saio bi izango dituzte astean; LHko 1. eta 2. mailetan jolasak izango dituzte, astean bi saio; LHko 3. eta 4. mailetan, multikirolean, 1+1 eskaintza izango dute, eta baita mendi programa ere; LHko 5. eta 6. mailetan, aste barruan bi saio eta aste bukaera bat edo 1+1 eskaintza izango dute, eta baita mendi programa ere; DBHn aste bukaera bateko eskaintza berezia izango dute. “1+1 eskaintzan, aste barruan lau aukera izango dituzte: bi egun eta bi ordu jarriko ditugu aukeran”, azaldu dute.

Gurasoekin bilerak

Hori guztiak azaltzeko, bilerak egingo dituzte gurasoekin. Eskola Kiroleko Koordinatzaile Egoitz Atxagak esan du ikuspegi hezitzailea arlo guztietara hedatu gura dutela. Horretarako, hiru lan-lerro bideratuko dituzte: ikasleen heziketa, hezitzaileen formakuntza eta epaileen formakuntza. “Gurasoen presentziak balio handia dauka. Lanketa egingo dugu guztiok helburu berarekin lan egiteko”, nabarmendu du Atxagak.

Elkarteak dituen erronka nagusiak lau dira:

. Koordinazio pedagogikoarekin eskola kiroleko kalitatea areagotzea.

. Herriko familiek proiektu berriekin bat egitea.

. Erakunde publiko zein pribatuen atxikimendua eta laguntza lortzea.

. Oñatiko kirol hastapenean erreferente izaten jarraitzea.