Esnea ateratzeko tresna ez da aukera bakarra. Batzuetan, gainera, ez da erabilgarria; izan ere, ez du beti funtzionatzen. Badaude ondo elikatutako jaioberriak dituzten emakumeak eta tresna horrekin esnerik ateratzea lortzen ez dutenak.

Familia medikua den Carmen Vegak azaltzen du badaudela esnea ateratzeko beste teknika batzuk, eta esnea eskuz atera daitekeela gogorarazten du. Hain zuzen ere, Marmet teknikaren inguruko azalpenak ematen ditu. “Teknika oso ezezaguna da, baina oso baliagarria batez ere edozein arrazoirengatik bularrak husteko premia sortzen bada”.

Esnea eskuz ateratzeko eta ondo ateratzeko praktika behar da. “Ohikoa da hasieran esne asko ez ateratzea, baina denborarekin eta praktikarekin emaitza hobetzen doa. Teknika hori menperatzen duten emakumeek edozein une eta lekutan atera dezakete esnea eta esnea ateratzeko tresnarekin beste esne ateratzen dute. Emakume batzuk ez dute bularrak husteko premiarik izango edoskitze prozesu guztian, baina beste batzuk behin baino gehiagotan eta ondo dago aukera hau ere ezagutzea”, azaltzen du Vegak.

Marmet teknika pausoz pauso

• Garbitu eskuak urarekin eta xaboiarekin. (Ez da beharrezkoa bularra garbitzea).
• Esnea ateratzen hasi aurretik egin masaje bat bularrean. Forma borobilean lehenengo eta gero bularraren goiko aldetik hasita titibururaino. Modu horretan eiekzio erreflexua suspertuko dugu.
• Jarri hatz erakuslea eta hatz lodia C forma egiten areolaren inguruan, titiburutik hiru bat zentimetrora.
• Presio egin torax aldera (saihetsak).
• Elkartu atzamarrak.
• Irristatu leunki aurreko aldera bularra bere hasierako posiziora itzultzen den bitartean.
• Errepikatu prozesua.
• Joan atzamarrak posizioz aldatzen bularraren atal desberdinetan eragiteko.
• Gomendatzen da bular bakoitzeko 5-7 minutuko saioak egitea eta bina ateratze saio egitea.

Kontuz, joera izaten da atzamarrak titiburua presionatzen amaitzea eta kontrakoa da egin beharrekoa. Emaitza hobea da eta titiburuan traumatismoa agertzea ekidin behar da.

Noizko gomendatzen da

• Oritz edo kalostro deiturikoa atera behar dugunean, erditu eta berehalako egunetan. Sasoi horretan kantitate oso txikiak izaten dira, mililitro gutxi batzuk eta eskuzko teknika esnea ateratzeko tresna baino egokiagoa da oritza tresnaren zirrikituetan gal ez dadin.
• Esne igoera bat-batekoa eta handia denean eta bularrak gogortzen direnean esnea ateratzeko tresna ez da eraginkorra. Zenbait kasutan egoera oker dezake.
• Mastitis egoeratan: eskuzko teknika egin daiteke zein esnea ateratzeko tresna erabil daiteke, baina hustuketa ondo egin behar da arazoari konponbidea emateko.
• Esnea jasotzeko bai esne banku bat prestatzen joateko bai esnea dohaintzan emateko.
• Lanagatik edo beste edozein arrazoirengatik jaioberriarengandik bananduta gaudenean.
• Titia kentzen denean esne produkzioa estimulatu gabe kongestioa arintzeko.

Behin teknika menperatzen denean hogei bat minutu nahikoak izango dira bi bularrak egoki husteko.

Albistearen iturria hemen. (gazteleraz)
Argazkiaren iturria hemen.