Galtzagorri Elkarteak Amattoren uzta izeneko ipuin bilduman oinarritutako app bat prestatu du Eusko Jaurlaritzako Kultura eta Hizkuntza Politika Sailaren eta Erein argitaletxearen laguntzarekin.

Liburuak Mayi Ariztiak Ipar Euskal Herriko ipuin kontalari zenbaiti entzundako eta bildutako ipuinak hartzen ditu oinarri eta app-aren bitartez liburu horretan biltzen diren ipuin tradizionaletan oinarritutako transmedia kontakizunak eta jolasak sortu dituzte. Ipuin horietako batzuk entzuteko aukera izateaz gain, haurrek eta gazteek abentura grafikoak bizi ahal izango dituzte, istorio horietako zenbaitetan sartu ahal izan diren VR eszenen bidez.

Amattoren uzta liburuaren app-a 8-12 urte bitarteko haurrentzat da, baina helduagoak eta helduek ere gustura erabiliko dute. Sortzeko Patxi Zubizarreta izan da gidoigile eta Maite Gurrutxagak egin dituzte irudizko animazioak. Musika Joserra Senperenak sortu du, eta ahotsa Amaia Hennebuttek eta Patxi Zubizarretak jarri dute.  “Liburuko istorioak bizitzeko modu berri bat eskaini diogu entzuleari eta irakurleari, egungo interaktuatzaileari”, adierazi dute Galtzagorri Elkartetik.

Amattoren uzta app-a eskuragarri dago Android eta iOS sistemetarako eta bakoitzaren saltoki birtualean dohainik eskura daiteke. Horrez gain, ordenagailurako bertsioa ere sortu dute; Galtzagorriren webgunean —www.galtzagorri.eus—dago on-line.