Nola egin antzinako ohituren transmisioa? Ahotsak.eus proiektuan adinekoei jasotako kanta-jolasak hainbat ikastetxetan landu dituzte, haurrekin. Eta transmisio hori erakusten duen bideoa prestatu dute, zazpi kantu-jolasekin.

Ahozko literaturan kantagintza eta jolasa eskutik helduta doaz maiz. Ahotsak.eus proiektuan jasotako kanta-jolasetan oinarrituta, Deba bailarako hainbat ikastetxetan lanketak egin dituzte umeekin. Zazpi kanta-jolas batzen dituen bideoa gertatu dute orain, transmisio horren erakusgarri dena. Adinekoez gainera, Eibarko, Elgoibarko eta Aretxabaletako umeak azaltzen dira bideoan:

Bideoa ikastetxeetan erabiltzeko -DBHko Euskara eta literatura ikasgaian- proposamen pedagogikoak ipini dizkiote, eta bideo-fitxa sortu dute Ikasgelan webgunean. Eusko Jaurlaritzaren Hezkuntza Sailaren babesarekin egin dute (EIMA 2.0.). Izan ere, oso garrantzitsua da umeek ez ezik gaztetxoek ere ondare hori ezagutzea, eta haiek ere transmisioaren katebegi bihurtzea. Guztira, 12 bideo-fitxa prestatu dituzte aurten, Euskara eta Literatura ikasgairako.

Ikasgelan webgunea ahozko ondarea ikastetxeetara bideratzeko sortu zuten: lehen etxeko sukaldean egiten zen transmisioa ikasgelara eramateko, teknologia berriak lagun hartuta. Dagoeneko gaikako 80 bideo baino gehiago jarri dituzte irakasleen eskura, hainbat gairekin lotutakoak, LHrako eta DBHrako. Hortaz gainera, 50etik gora kanta eta jolas dituzte jasota, HHn eta LHn erabiltzeko. Jira bueltan liburuxka-DVDa ere argitaratu zuten.

Albistearen iturria hemen.