Azaroan egin zituzten XXXVI. Euskal Antzerki Topaketak, eta abenduaren 6an jakinarazi zuten antolatzaileek Kepa Errasti aretxabaletarrak idatzi, eta Xake Produkzioak taldeak taularatu zuen Lur antzezlanak jaso zituela ikusleen boto gehien. Hori horrela, Ikuslegoaren Saria –600 euro– jasoko dute abenduaren 21ean, San Tomas egunean.

Aretxabaletakoak gustura hartu du sari berria: “Oso pozik gaude sariarekin. Batetik, publikoak ematen duen saria delako, eta horrek esan gura du publikoari barruraino heldu zaiola lana eta gustura ikusten duela, eta pozik, era berean, azken urteotan Azpeitiko Topaketa erreferente bihurtu delako euskarazko antzerkigintzan. Horrelako sariek indarra ematen dute aurrera egiteko, eta espero dugu jendeari obrarekiko interesa sortuko diola”.

Tolosako Topic zentroan estreinatu zuten transexualitatea ardatz duen lana, eta harrezkero hainbat aretotan eskaini dute, tartean, Aretxabaletako Arkupe kultura etxean. Gidoia idazteaz gainera, taularen gainean ere jarduten du Errastik.

Antzezlanaren gaineko informazio gehiago hemen.