Asteon eman du erabakiaren berri Eusko Jaurlaritzako Hezkuntza Sailak. 2019-2020 ikasturtetik aurrera hala nahi duten guraso elkarteek aukera izango dute ikastetxeko jantoki zerbitzua zuzenean kudeatzeko. Ehige guraso elkartetik kezkatuta azaldu dira. Uste dute Hezkuntza Sailak bereak diren ardurak alde batera utzi, eta ardura guztia guraso elkarteen gain uzten dituen eredu berri bat planteatu duela.

Eusko Jaurlaritzatik adierazi dute jantokien kudeaketaren aldeko apustua egiten duten guraso elkarteak prozesu guztiaz arduratuko direla: “Ikastetxe bakoitzak bere jantokiaren kudeaketa indibiduala garatu ahal izango du, guraso elkartearen bitartez eta Ordezkaritza Organo Gorenaren oniritziarekin –Ordezkaritza Organo Gorena osatzen dute: ikastetxeko zuzendaritzak, irakasleek, irakasle ez diren langileek, Udalak, familiek eta Bigarren Hezkuntzako kasuan baita ikasleek ere–. Kudeaketa honek prozesu guztia hartuko luke barne: sukaldeko profesionalen kontratazioa, elikagaiak eskuratzea, eta baita ere elikagaien segurtasunaren kudeaketa, besteak beste. Hezkuntza Sailak diru-laguntza deialdi bat irekiko du, hala nahi duten ikastetxeei kudeaketa zuzena errazteko helburuz”, adierazi dute Hezkuntza Sailetik.

“2017ko abenduan sortu zen Eskola Jantokien Jarraipen Batzordea. Hezkuntza Sailaz gain, batzordeak Jaurlaritzako hainbat sail –Osasun Saila eta Garapen Ekonomiko Saila, azken hau Elika, Nekazaritzako Elikagaien Segurtasunerako Euskal Fundazioaren bidez–, ikastetxe publikoetako ordezkariak, guraso elkarteenak eta Hezkuntza Sailaren menpeko sukaldeko langileen ordezkariak ere elkartu ditu”.

Ehige guraso elkartea kezkatuta

Ehige gurasoen elkartetik kezkatuta azaldu dira Hezkuntza Sailak aurkeztutako eredu berriarekin. Baldintzak eta finantziazioa zehaztu gabe familien artean eta gizartean nahasmena sortu dela dio.

“Hasieratik jakin dugun arren aholku-batzordea zela soilik, Eskola Jantokien Jarraipen Batzordean parte hartu dugu, eskola-jantoki eredu berri osasuntsuagoa, justuagoa, gertuagoa eta hezitzaileagoa lortzeko bidean pausuak eman genitzazkeelakoan. Argitu behar da erabaki hori aldebakarrekoa izan dela eta ez dela adostu. Erabakiarekiko desadostasuna jakinarazi genuen arren titular informatibo soil bat egin zuten publiko, familiak eta gizartean nahasmena sortuz: izan ere, ez dituzte argitu eredu berria bideragarri egingo luketen baldintza ezta finantzaketa ere”, adierazi dute Ehigetik.

Ehigetik uste dute iragarritako eredua bideraezina dela eta ondorengo balorazioa egiten dute: “Hezkuntza Sailak bereak diren ardurak alde batera utzi eta ardura guztiak guraso elkartearen gain uzten dituen eredu berri bat planteatzen du. Ehigeren ustez familiek eta eskolen ardura partekatuan oinarritu behar da eskola-jantokien kudeaketa. Martxan dauden lau esperientzia pilotuak –administrazioaren pertsonalarekin sukaldean– pausu on bat dira bide honetan. Iragarritako eredua bideraezina da: eskola-jantokien finantzazioa ezin da oinarritu “kudeaketa errazteko laguntzak” izeneko deialdi batean. Hezkuntza Saila behartuta dago aurkezten duen proposamenaren finantzaketa eredu sendo bat aurkeztera. Ez egitekotan, eskola-jangela kudeatu nahi duten eskola-komunitateak zigortzen ditu eta administrazioaren pertsonala izateko aukera kentzen die”.

Administrazioari zorroztasun gehiago eskatzen diote eta familien eskaerei berriro bizkarrik ez emateko. “Edozein kudeaketa eredu berrik ezin du alde batera utzi Hezkuntza administrazioaren ardura partekatua. Egoera hau datozen egunetan konponduko delakoan gaude. Gu prest gaude elkarrizketarako”.

Argazkiaren iturria hemen.