Eusko Jaurlaritzak eta hiru Aldundiek bultzatutako ekimena da eta Benjamin Franklinen esaera batek ematen dio hasiera: “Esaidazu eta ahaztuko dut, irakats iezadazu eta gogoratuko dut, parte hartzen utz nazazu eta ikasiko dut”. Eta jardunbide onak sustatzeko gida dela adierazi dute bultzatzaileek. Izenburua da: Adingabeekin diharduten kirol erakundeetan teknologia digitalak arduraz erabiltzeko gida eta digitalean dago eskuragarri.

Gero eta konektatuago dagoen gizartean bizi gara, Internetek eta sare sozialek protagonismo handiagoa dute. Gailu mugikorrak eskuratzeko adina ere jaisten doa, eta eskaintzen dituzten abantailak direla-eta horien erabilera hainbat esparrutan zabaldu da, kirol-esparruan ere bai. “Oso zabalduta badaude ere, baliabideak falta dira erabilera arduratsua eta segurua ezagutzeko, lehentasuna izan behar baitu adingabeez hitz egiten dugunean”, adierazi dute gidako bultzatzaileek.

Teknologi digitalak kirol eremuan

Teknologi digitalek nola lagun dezakete kirol eremuan? Alde batetik, berehalakotasuna eskaintzen dute komunikazioak, motibazioa indartzen lagun dezakete, taldeko harremanak erraz ditzakete, giro ona eta talde kohesioa susta dezakete… Baina arriskuak ere badaude eta horiek ekiditeko neurriak ere har daitezke: kideekiko, aurkariekiko edo arbitroekiko errespetu falta edo mehatxuak, kideekiko erasoa (ciberbullyinga), berdintasunezkoak ez diren jarrerak (sexistak, arrazistak, xenofoboak…), irudi konprometituen hedapena, eta baita sexu-jokabide desegokiak ere, helduok zuzendu edo saihestu behar ditugunak.

Kirol munduak ere zerikusia du gizartearen errealitatearekin, kontuan izanik, gaur egun, Whastapp, Instagram, Facebook edo Snapchat bezalako tresna digitalak gero eta gehiago erabiltzen dituztela kirol eremuko pertsonek eta taldeek ere. “Proiektu horren helburua hauxe da, kirol erakundeetako –klubak edo ikastetxeak– entrenatzaileei eta arduradunei tresna bat eskaintzea, entrenatzen dituzten edo erakundeko kide diren haurrekin eta nerabeekin mugikorren edo sare sozialen bidez nola komunikatu behar duten jakiteko aukera emango diena”, azaldu dute arduradunek.