Donostiako Ulia basoan martxan da Bihotz Inguru Baso Eskola

Aire zabaleko eskaintza da, eta pedagogia ez gidatuan oinarritzen da. Ikasturte honetan astean bitan elkartzen da bederatzi umeko talde finko bat. Asmoa da hurrengo ikasturtean astelehenetik ostiralera arteko eskaintza egitea.

Donostiako Ulia basoan du kokalekua Bihotz Inguru Baso Eskolak, eta Uliako Interpretazio Zentroko beheko solairuan dute arropak aldatzeko eta materiala gordetzeko txokoa. “Cristina Enea fundazioak kudeatzen duen eraikin publikoa da eta irailean sinatu dugu lagapen hitzarmena”, azaldu du psikopedagogoa eta Bihotz Inguru Baso Eskolako sortzaileetako bat den Kati Illarramendik. “Arrazoi horregatik bi eguneko eskaintza irten da aurrera ikasturte honetan. Ostegun eta ostiral goizetan izaten gara basoan”.

Illarramendik gaineratu du irabazi asmorik gabeko elkartea direla, eta bost boluntario daudela proiektuaren atzean. “Hurrengo ikasturtean astelehenetik ostiralera eskainiko dugu baso jolasgunea. Zehazteko dago goizeko edo arratsaldeko ordutegian edo ordutegi jarraian izango den; izan ere, egokitzapen lan txiki batzuk egin behar dira Uliako Interpretazio Zentroko beheko solairuan bazkaltzeko eta siesta egiteko tokia eskaini ahal izateko”.

Bideragarritasun ekonomikoa ere beharrezkoa dutela adierazi du. “Energia osoa proiektura bideratu ahal izateko babesleak behar ditugu. Izan daitezke enpresa pribatuak edo instituzio publikoak. Egia da familiek, aurten, kuota sinboliko bat ordaintzen dutela baina ez soldatak ziurtatzeko beste”.

Sentsibilizazioa eta formazioa

2013an hasi zen Kati Illarramendi Bihotz Inguru Baso Eskolarekin ametsetan. “Sentsibilizazio arloa lantzen hasi nintzen. Konturatuta nengoen interes handia zegoela, baina formazioa falta zela, eta horrela zaila zen familien konpromisoa lortzea”. Hainbat pedagogia alternatiboren inguruko ikastaroak antolatzen hasi zen, eta laster elkartu zitzaion proiektuaren beste bultzatzaileetako bat: Larraitz Altuna. “Horrela hasi ginen gaur egungo proiektua gorpuzten”. 

Goiz bat baso eskolan

Aire zabalean egiten dituzte saioak Bihotz Inguru Baso Eskolan. “Uliako parkeko aparkalekuan elkartzen gara. Xarma zuhaitza dugu bertan. Haurrei harrera egin ostean eguraldiaren araberako ibilbidea aukeratzen dugu. Basoa oso zabala da eta hainbat jolasgune ditu, beraz aukeratzen dugu goiz horretarako egokiena izan daitekeena. Hotz handia egiten duenean aukeratzen dugu eguzkia sartzen den jolasgune bat. Euria egiten badu aukeratzen dugu babestuagoa den jolasgune bat… Eta ibilbide bat egiten dugu egunero aukeratutako jolasguneraino. Iristerakoan hamaiketakoa egiten dugu, eta ondoren jolas libreko saioa hasten da. Ordu eta hiru ordu laurdeneko tartea izaten da gutxi gorabehera, eta ez ditugu haurrak gidatzen, ez diegu esaten zer edo zeinekin egin/egon behar duten. Umeek denbora bat behar izaten dute nor bere jarioan sartzeko (ordu erditxo bat inguru) eta konektatzen dutenean ekintza edo jolas batekin orduan ematen da benetako ikaskuntza. Jolas librea guretzako sakratua da. Hor azaleratzen dira haur bakoitzaren garapenerako beharrak eta ikusten dira hazkuntzako prozesuak argien. Hor ematen da benetako ikaskuntza; izan ere, benetan da berezkoa”.

Illarramendik azaltzen du jolas librearen saioa amaitzen dela energia jaisten doala ikusten dutenean. Ipuinaren deia dator orduan. “Tarte hori edukiak emateko erabiltzen dugu”. Amaitutakoan elkargunerako ibilbidea egiten du, berriz, taldeak. “Haurrak agurtzen ditugu eta 14:00ak aldera elkartzen dira gurasoekin. Orain, Uliara igotzen den taxibus zerbitzua erabiltzeko aukera ere badugu”.

Askotariko baso-eskolak

Euskal Herrian bi baso eskola daudela martxan azaldu du Illarramendik: Uliako Bihotz Inguru eta Ozaetako Plisti-Plasta. “Proiektu zoragarria da Ozaetakoa ere”, esan du. Baso eskola guztiak ez direla berdinak dio; izan ere, batzuk homologazioa planteatzen dute eta pedagogia hori hezkuntza erregulatuan sustatzea bilatzen dute. “Bihotz Inguru Baso Eskolatik aldarrikatzen duguna da pedagogia aniztasuna. Nahi duguna da gure pedagogia ere hezkuntzatzat hartzea. Gaur egun ez da horrela ez dugulako kurrikuluma betetzen, eta ez dugu betetzen kurrikulum hori ez delako koherentea gure pedagogia ereduarekin. Ez gaude prest kontzesio pedagogikoak egiteko. Guretzako benetako hazkuntza da haurrarengandik jaiotzen den inpultsotik ematen dena, hazkuntza pertsonala suposatzen duena. Espero dugu egunen batean sentsibilizazio bat egotea zentzu honetan, eta kurrikuluma betetzen ez duten gurea bezalako pedagogiek ere lekua izatea”.

Hainbat iturri pedagogiko

“Gure pedagogiak hainbat iturri pedagogiko besarkatzen ditu, eta haurraren garapen prozesu naturalak errespetatzea aldarrikatzen dugu. Umearen benetako garapen beharrei erantzun ahal izateko beharrezkoa da haiengan ipinita dauzkagun espektatibak eta presioak kentzea”, azaltzen du Illarramendik. “Zientifikoki frogatuta dago gizaki bizidunok gure burua eraikitzen gaudela etengabe, eta eraikuntza horrek norabide bat daukala. Haurra genetikoki prestatuta dago hazkuntzarako. Benetako hazkuntza ematen da haurraren inpultsoa jarraitzen denean. Kanpotik ezin dugu jakin benetan zein den une egokia edo zein den heldutasun une justua ume batek ezagutza bat jasotzeko. Pedagogia ez gidatua da gurea”.

Rebeca Wild da Bihotz Inguru Baso Eskolako lantaldearen erreferenterik nagusiena, eta hiru zutabe nagusi aipatzen ditu Illarramendik: hazkuntzarako haurrak duen berezko gaitasuna, maitasuna-errespetua-onespena, eta ikuspegi sistemikoa. “Basoak etapa honetako haurren beharrak asetzeko material guztia eskaintzen du, eta gu iturri pedagogiko jakin batzuetan oinarritzen gara”, adierazi du Illarramendik.

Argibide gehiagorako: bihotzinguru@gmail.com /Facebook: Bihotz Inguru baso-eskola / Twitter: @Bihotzinguru /

Argazkiak: Bihotz Inguru Baso Eskola