Bada oso zabalduta dagoen kezka bat: kirolean ematen den biolentzia eta gehienetan harmailetan gurasoek eta ikusleek sortzen dutena.

Kirolaren benetako balioez gozatzeko aldarria egiteko Eee!ntzun izeneko ekimena jarri dute martxan Gipuzkoan. Zapatuan eman zioten hasiera Arrasaten, eta ehunka neska mutikok bat egin zuten haka dantza eginez. “Nahikoa da!” esan zuten.

Babesa emateko bertan izan ziren Imanol Agirretxe eta Xabi Prieto futbol jokalari ohiak zein Maialen Axpe eta Malen Ruiz de Azua atleta arrasatearrak.

Kirolean eta bereziki eskola kirolean biolentziaren inguruko kontzientzia piztea du helburu Eee!ntzun ekimenak. Gipuzkoako herri gehiagotan ere egingo dute haka dantza aurrerantzean.

Kirola, batez ere gaztetxoenetan, gozatzeko dela azpimarratu nahi da eta mezu garbia helarazi diete; haka dantzatuko dute hori bultzatzeko, erritual modura.