Egokia da ikasgeletan zaintza kamerak jartzea?

Palmako ikastetxe batean 8 urteko ikasle bat kolpatu dute ikaskideek. Horrelako kasuen aurrean, EAEko fiskal nagusi Juan Calparsoro ikasgeletan zaintza kamerak jartzearen alde azaldu da.

Puntua aldizkarian psikologo bati, hezkuntza teknikari bati, abokatu bati eta guraso bati egin diote galdera.

Enara Agirre – psikologoa

“Neurri benetan larrixa, gaur egungo egoerian ispilu egitten dabena; partxe lana: egin barik darenen partez jarrittakua. Haur edo nerabe honek ze balore eta bizimodu dauzke holako egoeretan murgilduta egoteko? Esku-hartze potoluena hemen pentsatzen dot inbidala, zaintza kamaria gurasuei izetia lekixoke: zaintza, maittasun, ulermen, errespetu… baloriak benetan hemen finkatzen dielako, familixan”.

Iñaki Akizu – hezkuntza teknikaria

“Ikasgeletan zaintza kamerak jartzea arau orokor bezala ez zait onargarria iruditzen. Agresio zantzu argiak daudenean, bullying kasu zehatz bat argitzeko gainontzeko bide guztiak erre direnean, azken neurri bezala onargarria iruditzen zait. Kontuan izan behar da gaur egun ikasle gehienek kamera duen mugikorra daramatela gainean eta sarri erasotzaileak eurak dira grabaketak egiten dituztenak ondoren sarera igotzeko”.

Jon de la Maza – abokatua

“Zaintza kameren instalazioak helburu bezala izan behar du delitu-ekintzen aurkako prebentzioa. Hala ere, aipatutako kamerek funtsezko eskubidea urra dezakete: pertsonen intimitaterako eskubidea. Nire ustez, une guztian bermatu beharko litzateke osotasun fisikorako eskubidea eta adingabeen segurtasuna. Horiek jartzea justifikatuta egon daiteke, baldin eta ez baldin badago egoera horiek saihesteko beste biderik”.

Marga Campos – gurasoa

“Ondo iruditzen zait zaintza kamerak ikasgeletan edo pasilloetan jartzea horrelako kasuak kontrolatzeko. Bestela, komeni da uneoro norbait begira egotea. Eta, nire ustez, umeek baldin badakite momentu guztietan zainduta daudela, euren jarrera ere batzuetan aldatu egingo da eta ez dira horrelako gauzak egitera ausartuko. Nik neuk baimena emango nuke jartzeko. Komunetan jartzea, baina, beste kontu bat da”.