Elsa Punset idazlea eta dibulgatzailea da, eta garrantzi handia ematen dio ingurukoen maitasunari; izan ere, bere iritziz horrek ematen du indar gehien zailtasunak gainditzeko. “Ingurukoen begiradak hegoak ematen dizkigu. Hori adimen emozionala da”.

Punsetek dio gurasoek nahi izaten dutela seme-alabek lagunak edukitzea, zoriontsu izatea, ez topo egitea behin eta berriro arazo berdinarekin… “Nolabait sufrimendua ekidin nahi diegu, baina jakin behar dugu haurrek imitazioz ikasten dutela. Berdin du zer esaten diezun, egiten duzuna da benetan inporta duena”.

Ohartarazten du kontuz ibili behar dela umeengan jartzen ditugun itxaropenekin. “Nire ustez aiton-amonen maitasunarekin maitatu beharko genuke, baldintzarik gabeko maitasuna. Hori da haur bati egin diezaiokegun oparirik handiena. Utzi direnak izaten eta babestu erabakitzen duten horretan”.

Emozio positiboen garrantzia

Punseten iritziz denok jaio gara oinarrizko lauzpabost emoziorekin: beldurra, haserrea, tristura, nazka eta alaitasuna. “Konturatzen zarete kontua ez dagoela oso orekatuta? Emozio positibo bat eta gainerakoak… ez dugu negatiboak esango ez dagoelako emozio negatiborik, baina bai kudeatzen ikasi beharrekoak. Esaterako, tristura beharrezkoa da galera bat gainditu behar dugunean, baina denboraz kanpo, gehiegitan eta horrelakoak elikatzen tematzen den izaera batekin… ba, arazo bat dugu”.

Umeei emozioak kanporatzen utzi behar zaiela errepikatzen du behin eta berriz adituak, eta hezitzaileak adibide izan behar dugula, eredu. “Izena ipini behar diegu emozioei, eta etxean, mesedez, emozio positiboak landu. Seme-alabek behar dute fisikoki zein emozionalki loratzeko”.