Aretxabaletako guraso talde batek E! guraso ekimena jarri du abian. Euskararen erabilerak gora egiteko helburuarekin astebetez euskaraz bakarrik jarduteko konpromisoa eskatu die herriko gainerako gurasoei.

“Aretxabaletarren %40k egiten duela euskaraz diote azken ikerketek eta gutxitxo iruditu zitzaigun hainbati”, adierazi du Iurgi Etxebarriak, ekimenaren bultzatzailea den gurasoetako batek, eta gaineratu du: “Jakin dugu hainbat herritan egin dituztela esperimentuak: astebetez euskaraz bakarrik jardutea. Eta horri heltzea erabaki dugu geuk ere”. Gurasoen artean eta gurasoak haurrekin egon ohi diren eremuetan euskara gehiago erabiltzea dute helburu, eta bide batez, seme-alabendako eredu izatea: “Norbere hizkuntza ohiturez kontzientzia hartzea edo guraso guztiei euskaraz bizitzeko baliabideak eskaintzea ere gurako genuke”.

Horren berri emateko dei egin zieten atzo, astelehena, guraso aretxabaletarrei Herriko Plazara. Baita mordotxo batek erantzun ere dei horri. Eta, euskaraz bakarrik berba egiteko konpromisoa eskatu zieten: “Euskaraz jakin ez eta ulertzen duenak ere parte har dezake, beste gurasoei berarekin euskaraz egin dezaketela adierazita”, jakinarazi du Goretti Aiastuik, talde sortzaileko beste guraso batek. Erronka horretan parte hartuko duten gurasoei arropan jartzeko txapak banatuko dizkiete; berdea, euskaraz hitz egiteko konpromisoa hartzen dutenei, eta horia, berarekin euskaraz hitz egin dezaten nahi duten gurasoei.

Azaroaren 6tik abenduaren 1era bitartean

Ekimenaren berri orain eman arren azaroaren 6an jarriko dute abian. Izena emandako gurasoak lau taldetan banatuko dituzte, eta aste bakoitzean guraso talde bat izango da konprometitua: “Baina nahi izanez gero beste aste guztietan ere erronkarekin jarraitu ahal izango du”.

Izena emateko epea dagoeneko zabaldu dute. Helbide elektroniko bidez egin daiteke, esaterako: eguraso@gmail.com. “Kezkak batu gaitu eta ilusio handiarekin gabiltza lanean”, adierazi dute ekimenaren bultzatzaileek.

Antzerako ekimenik bada zure inguruan? Kontu iezaiguzu!