Ez dut nahi nire alaba zintzoa izatea, gure gizartean horrek esan nahi duena jakinda. Ba dakigu jaiotzetik kontzienteki edo inkontzienteki, neskak eta mutilak ezberdin hezten ditugula, eta honek beraien garapenean eragin handia duela norberaren eta identitatearen eraikuntzan eta testuinguruarekin erlazioan batez ere. Jolasean, erlazioetan, irudian ikus ditzakegu genero estereotipoak haur eta gazteetan, baina jarrera eta besteekin erlazionatzeko moduan ere. Horregatik ez dut nahi nire alaba zintzoa izatea.

Ez diot eskatuko txintxo eta geldirik egon dadin. Ez, ez geratu geldirik. Mugitu, esploratu, egin salto, ikutu… mugimendua ikaskuntza da. Gure testuingurua hobeto ulertzeko hau ezagutu behar dugu, beraz ez geratu geldirik. Jaiotzetik mugimendu ezinbesteko da gure gorputza ezagutzeko. Mugimenduaren bitartez garatzen gara eta gure testuinguru ezagutzen dugu. Mugimenduaren bitartez erlazionatzen gara. Haur bat geldirik egotera behartzen dugunean, bere garapena oztopatzen dugu.

Ez diot esango isilik geratzeko. Batzuetan marrua egin behar dugu entzunak izateko edo besteek gu hobeto entzuteko eta esaten duguna kontuan hartzeko. Batzuetan ozenago hitz egiteak lagundu egiten du. Beraz ez egon isilik. Nesken artean agresibitatea ukatzen dugu eta batzuetan agresibitatea beharrezkoa da geure burua defendatzeko eta mugak jartzeko. Neskek mugak jarri behar dituzte, eta horretarako batzuetan ezin gara isilik geratu.

Ez diot eskatuko besteen arreta ez deitzen saiatzeko. Batzuetan berezi egiten gaituzten ezaugarriak ditugu jaiotzetik eta batzuetan ezaugarri horiek gustuko ditugu, baina ezkutatu egiten ditugu. Berezi egiten zaituen hori erakutsi dezakezu. Adibide argi bat, Amaia Agiriano kideak azaldu zigun duela urte batzuk bere artikulu batean. Adimen Gaitasun altuko neskatoak beraien gaitasunak ezkutatu eta gutxiesteko joera hartzen dute 7 urtetatik aurrera. Neskek egokitzapen sozialerako ahalmen handiagoa izan ohi dute eta hau beraien dohainak erakusteko oztopo bihur daiteke.

Ez diot eskatuko helduek esaten dutena egiteko. Batzuetan helduek ez dute arrazoi. Batzuetan ez gara eroso sentitzen helduek eskatzen digutenarekin. Batzuetan ez da helduek esaten dutena egin behar. Gehienetan, helduak esaten duena betetzeak lagundu egiten du eta gida egokia ematen dio haurrari, baina helduak esaten duena batzuetan zalantzan jartzea ere onargarria da.

Ez diot eskatuko ez zikintzeko. Zikintzen dena garbitu dezakegu. Arropak zikin edukitzeak haurtzaroan batez ere, ondo pasatu denaren seinale da. Mugitu, ukitu, eta zikindu lasai. Hemen berriro esplorazioaren eta mugimenduaren garrantzia nabarmentzen da. Haur bati ez zikintzeko eskatzen badiogu, bere mugimendua eta esplorazioa mugatuko du eta horrek bere garapenean eragina izango du neurri ezberdinetan. Ez zikintzeko abilezia lortzen joango da modu naturalean.

Ez diot eskatuko polit janzteko. Zer da ba polit janztea? “Neskentzat” saltzen dizkiguten arropak askotan oso deserosoak dira, bai material aldetik eta baita funtzionalitate aldetik. Korrika egiteko bailarinak? Txirristatik jaisteko gona? Poliesterra material nagusi izaten duten Tul-a edo enkajeak beroa  eta azkura ematen dute. Leotardoak erori egiten dira eta ez dute eroso mugitzen uzten.  Askotan arropa mota hauek marka komertzialenetan batez ere, oso deserosoak dira. Badaude fabrikatzaile batzuk oso gona eta soineko erosoak egiten dituztenak, baina gutxiengoa izaten da. Horregatik ez dut nahi nire alaba polit janztea jakinda horrek gure gizartean duen esanahia.

Ez diot eskatuko platerean dagoena bukatzeko. Ez duzu jan behar goserik ez baduzu. Platerean dagoena bukatzeak goserik ez duzunean ez du esan nahi jarrera ona duzunik, gehiegi jaten ari zarela baizik. Gure gorputza errespetatzea, behar duena eskaintza da eta ez gehiago. Haur bat jatera behartzen dugunean, ez gara bere gorputza errespetatzean ari. Berak erabaki behar du, bere gorputzeko sentsazioak kontuan hartuz, zenbat jan nahi duen eta zenbat behar duen.

Ez diot eskatuko Irribarre egiteko. Batzuetan ez dugu gogorik irribarre egiteko eta ez da ezer gertatzen. Batzuetan ez dugu nahi atseginak izan pertsona batzuekin eta ez da ezer gertatzen.Oso garrantzitsua da norbera bere emozioekin konektatzea eta hauek errespetatzea. Haurrek zentzu honetan libre sentitu behar dute benetan sentitzen dutena espresatzeko.

Ez diot eskatuko norbaitek agurtzen duenean erantzuteko. Ezagutzen ez dituzun pertsonak ez dituzu agurtu beharrik. Ez duzu zertan jende guztiarekin atsegina izan behar. Emakumeengan besteekin atsegin izateko beharra sustatzen dugu eta honek gure autoestimuan izugarrizko eragina du, besteen mesedera egoteko joera sortzen duelako besteak beste.

Kontziente naiz hemen azaldutako guztia betetzea ez dela erraza izango,  gizartearen presioa indartsua delako. Askotan gu ere,  emakume bezala, hemen aurretik azaldutako guztian erortzen gara.