236 lagun elkartu dira Gipuzkoako Harrera Familien XVIII. Topaketan, Donostian. Familia harreraren prozesuan dituzten esperientziak eta bizipenak partekatzeko eta egunero sortzen diren erronken berri elkarri emateko balio izan du hitzorduak.

 

Gipuzkoako Foru Aldundiak eta Beroa Gipuzkoako Harrera Familien Elkarteak antolatuta  egin dute topaketa Donostiako EHUko Carlos Santamaria zentroan. Markel Olano Ahaldun Nagusiak jakinarazi du Gipuzkoan 358 ume eta nerabe daudela harrera familietan bizitzen, tartean Foru Aldundiaren tutoretzapean dauden sei urtez beherako haur gehienak. “Beste 421 tutoretzapeko zentroetan daude. Horietatik 64 bizi diren lekutik ateratzeko moduan daude harrera familia aurkitu bezain azkar. Familia bat behar dute, beraien zaintza eta heziketaren kargu egingo dena; baina familia horretako beste kide bat izateaz gain, jatorrizko familiarekin harremanetan jarraitzeko aukera ere nahi dute, nahiz eta beraiekin ez bizi”.

64 kasu horietatik seitan, familia zabal batek hartzeko aukera aztertzen ari dira; 37 kanpoko familia boluntario batera bideratuta daude, eta 21 —12 neska eta 10 mutil— familia espezializatu batera —pertsona bakarra edo bikotea—, profesionala izan behar duena.

Hala, tutoretzapeko adingabe horiek hartzeko prest dauden familien kopurua handitzeko dei berezia egin dute. Harrera familien zerbitzuarekin harremanetan jartzeko telefonoa eta posta dira: 943 11 25 22 / familiaharrera@gipuzkoa.eus.

Laguntza profesionala familientzako

Foru arduradunek azpimarratu dute harrera familia guztiek profesionalen laguntza dutela adingabeari, familia hartzaileari eta jatorrizko familiari jarraipena egiteko eta laguntzeko. “Diru laguntza ere izaten dute, harreran dauden haur eta nerabeen oinarrizko premiak asetzeko. Hileko diru konpentsazioaz gain, beste behar batzuk estaltzen dira: eskolaz kanpoko laguntzak, osasun publikoak estaltzen ez dituen tratamenduak, arreta psikologikoa, eta abar”.

Harrera mota bakoitza —larrialdikoa, alde batekoa edo behin betikoa— umeak bizitzaren une jakin batean duen beharraren araberakoa da. Bestalde, Beroa elkarteak aisialdia eta topaketa informalak eskaintzen die familia hartzaileei eta umeei, eta asoziazionismoa sustatzen dute esperientziak partekatzeko eta administrazioaren hobekuntzak sustatzeko esparru horretan.

Argazkiaren iturria hemen.