Gurasoei begirako ‘era.eus’ sortu dute Nafarroako 28 euskara zerbitzuk

Nafarroako toki-entitateetako 28 euskara zerbitzuek sortu dute era.eus webgunea elkarlanean, eta euskaraz ikasten duten haurren gurasoei laguntza eta baliabideak eskaintzea du helburu. “Familiek helarazten dizkiguten beharrek eta eskaerek aberastuko dute webgunea eta, denon artean, belaunaldi berriak euskaraz hazteko bidea”, azaldu du Kristina Urrutia Apezetxeak.

“Haurrek ikastetxeetan dagokien adinerako ezagutzak eta gaitasunak jasotzen eta garatzen dituzte, baina euskarak gizartean duen presentzia desorekatua kontuan hartuta, ezagutza eta gaitasun horiek eskolaz kanpo ere indartzea egokia da, esaterako, etxean, kultur jardueretan edo eskolaz kanpoko jardueretan”. Hain zuzen ere, bide horretan laguntzeko sortu dute era.eus.

Entitate parte-hartzaileak

Egitasmoan parte hartzen duten toki-entitateak dira: Agoitz-Aezkoako euskara zerbitzua, Antsoaingo udala, Aranguren ibarreko udala, Atarrabiako udala, Auritz-Erroibar-Artzibar-Luzaide euskara zerbitzua, Barañaingo udala, Baztango udala, Berriobeitiko udala, Berriozarko udala, Bortzirietako euskara mankomunitatea, Burlatako udala, Eguesibarko udala, Esteribarko udala, Galarko udala, Garesko udala, Iruñeko udala, Iparraldeko euskara mankomunitetea, Irantzu mankomunitatea, Izarbeibarko mankomunitatea, Lizarrako udala, Malerrekako mankomunitatea, Orkoien-Oltza Zendea-Etxauriko euskara zerbitzua, Sakanako mankomunitatea, Tafallako udala, Uharteko udala, Zaraitzu-Erronkariko euskara zerbitzua eta Zizur Nagusiko udala.

Guraso euskaldunentzako eta ez euskaldunentzako

Euskara zerbitzuetako profesionalek gurasoengandik urteetan jasotako kezkak eragin du plataforma digitalaren sorrera. “Sumatzen zen gurasoengandik horrelako hutsune bat bazegoela”, azaltzen du Urrutiak. Atari digitala euskaraz dakiten zein ez dakiten gurasoei zuzenduta dagoela argitu du eta azpimarratu du Nafarroan ematen den kasuistika handia. “Nafarroa bera hain dibertsoa eta hain aberatsa izanda seme-alabak euskaraz hazi eta hezi nahi dituzten gurasoen galderak eta zalantzak milaka dira eta askotarikoak. Horiei guztiei nolabaiteko erantzuna emateko jaio da era.eus. “Nafarroatik sortu da baina Euskal Herri osoko gurasoei zabal daiteke erabat”.

Webgunea euskaraz zein gazteleraz dago eta bertan aurkitu daitekeen edukia hiru multzo handitan antolatu dute: familia, eskola eta eskolaz kanpokoak. Heziketarekin lotutako artikuluak zintzilikatuko dituzte bertan eta baita ere euskaraz egin daitezkeen jarduerak edo kultura agenda.

Lekukotasunak ere eskainiko dituzte bideo formatoan. Euskaraz ikasi duten pertsonen lekukotasunak izango dira eta bertan euskara ikasteak suposatu diena azalduko dute. Baita ere zertan lagundu dien beraien ibilbide profesionalean edo pertsonalean.

Baliabideen atalean, berriz, musika, ipuinak, marrazki bizidunak, zinea, jostailuak… eskainiko dituzte. Guztiak euskaraz.

Erabilgarri izateko sortua

Kristina Urrutia gustura azaldu da era.eus atarian izandako harrerarekin. “Oso hasiera bikaina izan du. Aurkeztu eta berehala, gainera. Hasierako mugimendua Iruñerrian izan da, baina azkar zabaldu da gurasoen artean. Beharra bazegoen eta nora jo ikusi dutel guraso askok”.

Entzun elkarrizketa