Gipuzkoako Foru Aldundiak Eskola kirolera zuzendutako Eee!ntzun kanpaina berria aurkeztu du. Gipuzkoako hainbat kirolari ezagunek parte hartu duten Haka dantzaren bitartez, kirolaz “gozatzeko eta gozatzen uzteko” eskatzeko. Besteak beste, Errealeko Xabi Prietok, Asier Illarramendik eta Alvaro Odriozolak, Eibarko Asier Riesgok eta Nerea Dantzegik, Markel Alberdi igerilari olinpikoak, GBCko Daniel Clarkek eta Xabier Orozek, IDK Gipuzkoako Onintza Aurizek eta Toch Sarrek.

Kezka dago kirolaren arloan ematen diren oldarkortasun kasuekin eta eskola kirolera zuzendutako Eee!ntzun kanpainak “harmailetan izan diren oldarkortasun eta indarkeriazko” gertaerei aurre egin nahi diela adierazi dute Foru Aldunditik. Mezua argia da: eskola kirola programan parte hartzen duten neska-mutikoek jarrera zaintzeko eskatzen diete harmailetan dauden helduei.

Zer pentsatua ematen duen eskaera

Ekimenak eskola kirolean parte hartzen duten haurrak eta gaztetxoak bihurtu nahi ditu protagonista, partiduetara joaten direnei harmailetan “goza dezaten” eta “arbitro, entrenatzaile nahi jokalarien aurkako jokabide oldarkor eta biolentoak alboratu” ditzaten eskatzeko.

Kanpainaren ardatza eskola kiroleko jokalariek partiduaren aurretik egingo duten haka izango da; kantu batek, dantza batek eta zeinuen erabilerak osatzen dute; “horrela, modu jostarian, emozio egoera bat sortuko da partidaren aurretik, eta hausnarketarako bidea eskainiko die eskola kiroleko partiduetara bertaratzen diren guztiei”, Aldunditik nabarmendu dutenez.

Gipuzkoako Foru Aldundiak kanpainaren aurkezpenean azaldu duenez, eskola kiroleko talde batzuk hasiak dira dagoeneko dantza prestatzen, eta pixkanaka talde guztietara zabalduko da ekimena.