Hezkuntza antiarrazistaz hausnartzen: denon ardura, denon gaia Arrazakeria ez da iraganeko arazo bat, ezta pertsona “gaizto” batzuen kontua soilik ere.


Arrazakeria egunerokoan erreproduzitzen den egitura soziala da: eskolan, etxean, kalean eta komunikabideetan. Askotan oharkabean gertatzen da, keinu txikietan, hitz jakin batzuetan edo isiltasunetan. Horregatik, denok gara arrazistak, neurri batean, bizi garen gizarteak hala hezi gaituelako. Eta horregatik, gai honek denok ukitzen gaitu, bereziki hezkuntzan parte hartzen dugunok.


Testuinguru horretan kokatzen da Hezkuntza antiarrazistaz hausnartzen jardunaldia,
Bergarako Seminarixoan egingo den topaketa. Jardunaldi honen helburua ez da erruduna seinalatzea, baizik eta kontzientzia hartzea, galderak egitea eta tresnak partekatzea, arrazakeriari aurre egiteko bide kolektiboak eraikitzeko. Jardunaldian zehar, hiru hizlarik esperientzia eta begirada osagarriak eskainiko dituzte:


● Amaia Jackson-ek arrazakeriaren identifikazioa eskolan landuko du. Askotan arrazakeria ez da esplizitua: curriculumetan, itxaropenetan, diziplina-ereduetan edo ikasleei begiratzeko moduan agertzen da. Identifikatzea da lehen urratsa eraldatzeko.


● Leyao Rovira-k galdera ausart bati helduko dio: nola eragiten dute ikuspegi zuri-salbatzaileek adopziozko identitate ez-zurien eraikuntzan? Bere ekarpenak aukera ematen digu helduon diskurtsoek eta jarrerek haur eta gazteen identitatean duten eragina ulertzeko.


● Hajar Samadi-k eskolan bizikidetza inklusiboa sendotzeko gakoak eskainiko ditu,.eguneroko praktiketatik abiatuta. Inklusioa ez da hitz polit bat: erabaki zehatzak eta jarrera kontzienteak eskatzen ditu.

Horrez gain, Elene Mengyu Larrinaga-ren “Hogeita bat” film laburraren proiekzioak hausnarketa emozional eta pertsonala ekarriko du, arrazakeriak bizipenetan duen eragina ikus-entzunezkoaren bidez lantzeko.


Guraso gisa, beharrezkoa da geldialdi txiki bat egitea eta hausnartzea: zer ikasten dute gure seme-alabek egunerokoan, etxean, eskolan eta gizartean? Zer mezu jasotzen dituzte onartutzat jotzen denari buruz, nor den “gurekoa” eta nor ez. Arrazakeria ez da soilik ikastetxeetan gertatzen den zerbait; etxeko diskurtsoetan, jarreretan eta isiltasunetan ere erreproduzitu daiteke, baina baita zalantzan jarri eta ere.
Jardunaldi hau aukera bat da elkarrekin ikasteko, entzutekoa, eta batez ere, erantzukizuna partekatzeko. Hezkuntza antiarrazista ez da gutxi batzuen ardura: denona da.