Aretxabaletako Azatza Gunean proiektu berri dute martxan. Lau urtetik gorako neska-mutikoentzako Hezkuntza Sortzailean oinarritutako jolasteko tailerrak eskainiko dituzte urritik ekainera bitartean. Amaia Otaduyk gidatuko ditu.

Arno Stern da Hezkuntza Sortzailearen aita, eta defendatzen du hezkuntza sortzaile baterako ezinbestekoa dela ikaskuntza prozesuan parte hartzen ari direnen aldamenean egotea inor zuzendu edo epaitu gabe. Nor bere esperientzia pertsonaletik abiatuko bada ere kontuan hartu behar dira bidean sortzen diren beharrak, eta garrantzitsua da ahalik eta anitzena den talde batean lan egitea, giro honetan konparaketa zilegi ez delarik.

Hezkuntza Sortzailearen irizpideak jarraituko ditu Amaia Otaduyk Aretxabaletako Aozaratza auzoko abadetxean dagoen Azatza Gunean martxan jarriko dituen tailerretan. “Umeak aske izango dira barruak eskatzen diena egiteko”, azaldu du. “Ez dugu ezer erakusten. Umeak egiten du bidea. Guk materiala jarriko dugu. Gutxi: tamaina guztietako kartoiak, oihal zatiak eta sokak. Umeak barruak eskatzen diona egingo du. Aukeratzen badu bakarrik egotea, bakarrik eta bestela taldean. Ez diogu erritmo jakin bat inposatuko”.

Ideia da irudimena lantzea eta umeak bere bidea egitea kanpoko gidaritzarik gabe. “Nire lana da sor daitezkeen zailtasunak gainditzen laguntzea edo umeen artean sor daitezkeen tirabiretan gidari lanak egitea”, azaldu du Otaduyk. “Jolasteko tailerretan gauzak ez dira ondo edo txarto egoten. Ezer ez dago azkarregi edo motelegi…”.

Areto handi bat dute Azatza Gunean jolasteko tailerretarako. “Aldamenean beste gela bat dago gurasoentzako edo zaintzaileentzako. Saioak ordu eta erdikoak dira, eta tarte horretan umeren batek gurasoekin egoteko beharra badu ba aukera hori ere badago”.