Covid 19ak sortutako egoera honetan gurasoak haurren ikasketa prozesuko bidelagun  nagusi bilakatu  gara egun batetik bestera. Guraso  askoren kezka handienetako bat  izaten da  irakur eta idazte prozesuan bidelaguna nola izan. Bidelaguntza honetan ez gara adituak ez gara irakasleak eta lasaitasunez bizitzea izango da gako nagusia.

Jakina da bestalde, ikastetxe, irakasle bakoitzak bere metodologia propio eta ezberdina  ere garatuta duela.  

Gaurko honetan Idoia Larrañagaren  laguntza izan dugu, bera  bidelagun da Azkoitiko Bizilore eskola aktiboan, eta idazketa eta irakurketa prozesuak nola laguntzen dituzten azaldu digu. Beraien lana Elena Laiz irakaslearengandik jasotako ikasketan oinarritzen dute. Metodoak erabili ordez, idazten ikasiko badu, haurraren barne-prozesu naturala errespetatu behar dela dio Elena Laiz irakasleak: “Giro alfabetizatu batean, umea bera joango da idatz-sistemaren ezaugarriez jabetzen, igaro beharreko fase batetik bestera pasatuz; alferrik da behartzea eta kaltegarria presionatzea”.

Haurrak bere barne-prozesua egin behar du oinez ibiltzen hasteko, esfinterrak kontrolatzeko, lehen hitzak esateko… Bada, beste horrenbeste gertatzen da irakurketarekin eta idazketarekin ere: ume bakoitzak, pixkanaka, bere erritmoan egiten duen ikerketa-prozesua da .

Idazketa prozesua argazki bidez azaldu digu Idoiak , haur batek  bide honetan ematen dituen urrats ezberdinak bereiziz, eta azalpenak emanaz.