Mutiko batek beste bat jo du, eta arazoa konpontzeko elkartu dira mutikoen gurasoak. Bilera edukazio handiz hasiko da, baina hasi eta gutxira beste bide bat hartuko du, mutikoen gurasoen frustrazioak eta miseriak azalaraziz.

Labur esanda horixe da Txalo konpainiaren Jainko basatia antzezlanaren abiapuntua. Komedia dramatikoa da: komedia hainbat pasartek irribarrea eragiten dutelako, baina drama fikziozko guraso horien zenbait erreakziok zer pentsatua ematen dutelako. Aitzakia batetik abiatuta —ume batek beste bat jo egiten du— giza harremanen gaineko gogoeta egiten du antzezlanak. Ez da, beraz, komedia hutsala.

Seme-alaben arteko liskarrak konpontzeko elkartzen dira bi bikoteak baina nork bere ezaugarriak ditu eta horrek badu eragina gatazkaren konponketan. Egunerokotasunarekin oso lotua buruari eragitea bultzatzen duen obra horietakoa da.

Aitziber Garmendia Ane da, banketxe bateko langilea, emakume lasaia eta baketsua, alkoholaren aparretan murgiltzen den arte. Mikel Losada Alex da, Aneren senarra, arrakasta handiko abokatu gaztea, zintzoa, burlatia, zuzena eta sakelako telefonorik gabe galduta dagoena. Xanti pertsonaia Andoni Agirregomezkortak interpretatzen du; burdingilea lanbidez, Veronika emaztearen gonaren azpian bizi dena, lehertzen den arte. Teresa Andonegi da Veronika, kultura handiko etxekoandre aurrerakoia, tragoxka pare bat hartuz gero itxuraldatu eta erresumindu egiten dena.

Begoña Bilbaok zuzenduriko obra da. Jatorrizko testua Yasmina Reza idazle eta antzezle frantziarrarena da eta Le dieu du carnage (Triskantzaren jainkoa) izenburuarekin estreinatu zen.
Euskarazko moldaketarako Martin Agirrek egin du itzulpena.

Gurasoei zuzendutako gune honetan aipamena merezi zuela pentsatu dugu.