Hasieran, feminismoak zeru-lurrak egin zituen, eta askatasunaren zaborrontzi bat, hori baita ere. 1968ko uda akaberako egun horietan izanen zen hura, Miss Amerika lehiaketa horietako baten kari. Han zeuden, gureak – feministak -, zorioneko askatasunaren zaborrontzira trapu, takoi, ezpainetako margo eta gisakoak botatzen, bateon bati bururatu zitzaionean bere titi-zorroak ere merezi zuela ba bide hori, estutzen ziolako, patriarkalki estutu ere.

Behin bidea zabalik zela, halaxeko moduz joan zen 70etako hamarkada; titi-zorroak kentzen eta haizatzen protesta seinale gisa, askatasun aldarrian, bra-burning betean eta patriarkatua erregosten. Barrikada feministara, berriz ere, gorputza ekarri zuten emakume haiek, eta titiak – gureak -.

Geroztik amatu ziren haietako hainbat, baita titidun berriez erditu ere.

Kontua da amatu eta sortu bidenabar, zeruaren puxketape honetantxeko ama-alaba horiei, tardofrankismoak asmatutako eguzki eta hondartza jiteko turismo hura suertatu zitzaigula grazian; milioi batgarren turista izateko esperantzan, hantxen, Seat ochocientoscincuentan plaiara joateak, patata tortilla tuperrak eta ogi xehetuan pasatutako xerrak, krax krax krax, hondartzako legarrarekin nahasi antzean jateko. Eta, horrekin batera, bistan denez, bainujantziak; Fragaren Meybak Palomaresen, suediarren bikiniak Benidorm aldean eta auzoko mertzerian erositako neskatoon kulerotxo koloretsuak, Salouen edo Laredon ez bazen,  etxetik hurbileneko hondartza, kai, erreka eta piszinetarakoak.

Joan dira, alta, garai haiek eta, haiekin, baita Meybak eta auzoko mertzeriako bainurako kulerotxoak ere. Orain apenas ez da auzoetan mertzeriarik, ez eta kulerotxorik ere hondartza, kai, erreka, piszina edota uretan beratzeko dena delako tokian. Orain moderno gara, garaiek eskatzen duten gisan, eta, hartaz, merkatalguneko ehungintzaren multinazionalean erosten dugu bainurako moda, bere ume eta haurrentzako kulero & titi-zorro konjuntoak barne. Eta modernoetan modernoenak garen hauek, aurrerakoi porrokatuok, titi-zorroak sutara botatzen zituzten amatxi horien haurrok, gure aludun umeei titi-zorroz estaltzen dizkiegu zeraren zerak, ez bada, kasu!, betegarridun titi-zorroz hanpatzen dizkiegula noizbait titi izanen direnak. Neskatoen gorputzak customizatzen gabiltza, hara, patriarkalki customizatu ere.

Badu kontuak bere ipuinondoa ere, ze, martxa honetan, amatxiek, manifestudun eta manifestazioetako andre-zaharrek, erakutsi beharko diete bilobei askatasunaren zaborrontzirako bide berria nondik eta nondik den, tarteko belaunaldirik inoiz izan ez balitz bezala. Eta amatxi-biloben bat-egiteek ekarriko dute, akaso, gurasook haurrari bainurako bi piezatako konjuntoa janzteko galdegitean, honek zera ihardestea: “Bainatzeko jantzi? Zertarako ba? Bustiko da eta!”