Txatxilipurdi aisialdi elkarteak antolatuta jolas librearen inguruko hitzaldi bat, bizipenetan oinarritutako tailerra eta mahai ingurua egingo dituzte otsailaren 28tik apirilaren 14ra bitartean. Txatxilipurdiko zuzendari Amaia Etxabek azaldu du Berramesten proiektuaren baitan hasi zutela jolas librearen garrantziaren inguruko hausnarketa. “Haurren parte-hartzea, aisialdiaren nolakotasuna, aisialdi horren balioak… hainbat gogoeta abiatu genituen eta heldu garen ondorioa da haurrentzat eta gazteentzat antolatu barik haurrekin eta gazteekin antolatu nahi dugu. Eta erronka horretan gabiltza. Ez da erraza. Gure zalantzak, kezkak eta erronkak ditugu, baina ahalegin horretan ari gara”.

Barrurako zerbait izan zitekeena zabaltzea erabaki dute Txatxilipurdin. “Gogoeta horiek gure artean eman beharrekoak dira, baina ez dugu soilik Txatxilipurdin eragin nahi. Herrian ere eragin nahi dugu horregatik antolatu ditugu jardunaldiok”.

Itziar Arregiren hitzaldia otsailaren 28an

Arrasateko Kulturaten egingo dute jardunaldiko lehenengo saioa, eta Huheziko Hazitegia ikerketa taldeko Itziar Arregi gonbidatu dute hitzaldia egitera. “Itziar Arregi ikerketa bat egiten ari da jolas librearen inguruan. Ikerketa hori eskola eremura mugatzen da, baina hitzaldian prisma zabalago batetik hitz egingo du. Uste dugu interesgarria izango dela irakasleentzako, hezitzaileentzako edo gurasoentzako. Nahi duguna da hausnartzea jolasa zer den, zein jolas mota dauden, jolaserako zein espazio eta baliabide ditugun… Kalean eta herrian elkarrekin gaude guztiok eta garrantzitsua da denok ulertzea umearen jolasa zer den eta zelan ematen den. Espazio horiek errespetatzeko eta ahal dela inklusibo egiteko”.

Tailerra Txusma Azkonarekin martxoaren 17an

Lizarrako Plisti Plasta egitasmoko kide da Txusma Azkona eta bizipenetan oinarritutako tailerra egingo du Arrasateko Etxaluzen martxoaren 17an, 09:30etik 13:30era. “Herri hezitzaileen inguruko Oinherri egitasmotik ezagutzen dugu Txusma Azkona. Haurraren jolasaren eta hazieraren inguruko egitasmoa da Plisti Plasta eta jolas librearen inguruko tailer bat eskainiko digu. Jolasa: eskubidea eta errealitatea liburuaren egileetako bat da Azkona. Haurren jolasaren behaketatik zer ikas daitekeen, zein ekarpen egin ditzakegun, zelan erraztu dezakegun, ez oztopatzeko zer egin daitekeen… Horrelakoak landuko ditugu tailer horretan. Zalantzak argitzeko aukera ere izango da”, esan du Etxabek.

Ez da haurrei zuzendutako tailerra izango baina haurrekin bertaratzeko aukera eskainiko dute. “Dinamikak eta hausnarketak helduentzako izango dira, baina familia batek haurrekin etortzea erabakitzen badu egongo da gune bat egokitua. Altzoan edukitzeko aukera ere bai.

Tailerrerako beharrezkoa da izena ematea. Txatxilipurdiren webgunean dago bete beharreko orria. Prezioa da 10 euro. Gaiaren inguruko liburuxka nahi izanez gero, berriz, 15 euro. Ordainketa egunean bertan egingo da.

 

Jolasari buruzko mahai inguruan apirilaren 14an

“Hitzaldian gaia kokatu eta tailerrean gaia behatu ostean mahai ingurua egingo dugu eremu ezberdinetan ematen den jolasa zelan bizi dugun partekatzeko”, azaldu du Etxabek. “Eskolan jolasak zein leku du? Familian edo etxe giroan zelan bizi dugu? Herrian ze aukera edo oztopo topatzen ditugu jolas librerako? Kide desberdinak gonbidatu ditugu mahai-ingurura eta nork bere ikuspegia emango du”.

Antzuolako Herri Eskolako irakasle ohi Mila Etxezarreta izango da esaterako mahai inguru horretan. “Ideia da nork bere ikuspegia ematea eta gero solasaldi bat sortzea bertara gerturatzen den jendearekin”.