Era.eus  webgunetik ekarri dugu artikulu hau.

Pipitaki-papataki, nik dakina nork daki?

Jolasak eragin positiboa du haurren garapenean, zalantzarik gabe. Haren bidez, dibertitzeaz gain, mundua ezagutzen dute, alegia, beraien ingurunea  aztertzen eta deskubritzen dute. Baina, beharbada, oharkabean pasatzen da haurren hizkuntzan nola eragiten duen. Izan ere, jolasak hizkuntza barneratzen laguntzeko eta garatzeko ahalmen handia du, besteak beste.

Txiki-txikitatik haurrek jolasak baliatzen dituzte beraien gaitasunak areagotzeko, eta ez soilik kognitiboak, baizik eta sozialak eta linguistikoak ere. Eta hizkuntzarekin jolasteko dauzkaten aukerak dira haurrek hizkuntza garatzea bultzatzen duena, neurri handi batean.

Hizkuntzarekin jolastu? Adin guztietan egin daiteke eta hamaika modu daude, jakina, baina badira haurrek bereziki gustuko dituztenak. Plazan direla, ezkutaketan jolastera doazela nork zenbatuko duen erabakitzeko Dona-Dona Katona kantatzen dutenean, zertan ari dira, bada? Zotz egiten, jakina! Eta esaldi berean soinu bereko hainbeste hitz jarraian? Ahokorapiloak ote? Ikusi makusi… zer ikusi? Igarkizunak!

Jolasaren inguruan asko ikertu da azken hamarkadetan eta, oro har, ikerketek erakusten dute badituela lotura estuak  hizkuntzaren garapenarenarekin. Hori dela eta, emaitza on-onak dakartza familian gisa horretako jolasetan aritzeak.  Hizkuntza jolasgai bilakaturik, guraso eta seme-alaben artean primeran pasatzeko jostailua sartzen da jokoan, etxerako balio duena, baita plazarako, kotxe bidaietarako… ere. Haurrendako mesedegarria da erabat, hiztegia ikasten eta adimena zorrozten dutelako oso modu jostagarrian. Plazer-iturri bilakatzen da hizkuntza bera. Gainera, gisa horretakoak behin ikasita, lagunekin daudenean ere erabiltzen hasten dira haurrak.  Horrela, bada, familian transmititutakoa kalera hedatzen da.

Hitzaren giltza, hitzaren giltza, ahoa ireki eta elkarrekin mintza!

Hainbat aho-korapilo, igarkizun eta zotz egiteko formulak interneten:

 Aho-korapiloak

Zotz egiteko formulak

Igarkizunak

Bilduma-liburuak:

Puntan Punta Bat – Haur folklorearen bilduma, X. Etxaniz Erle

Axa mixa zilarra, J.M. Olaizola “Txiliku”

Zer dela eta zer dela, X. Etxaniz Erle

Aizak eta aizan elkarrekin dantzan, A. Lertxundi

Mintzo naiz ixilik…, J.K. Igerabide

Artikuluaren iturria: Era.eus