Jolasaren Nazioarteko Eguna izan zen atzo, maiatzaren 28a. Hori ospatzeko eta aldarrikatzeko jolasa haurren eskubide bat dela eta kalea jolasteko gune naturala dela, Arrasateko hiru ludoteketako gaztetxoak eta hezitzaileak kalera atera ziren.

Kalean jolasteak herriari bizitasuna ematen diola ikustarazi nahi izan zuten, elkarbizitzarako gune direla azpimarratuz. Errespetuz, bakoitzari bere lekua aitortuz eta utziz, kaleak guztien elkargune izatea nahiko lukete.

Umeak pozik ibiltzen dira orokorrean kalean, eta hain justu ere, Arrasateko ludoteketatik geroz eta gehiagotan irteten dira kalera jolastera. Hain zuzen ere elkarbizitzarako praktika ezin hobea da kalean jolastea.