Kutxa Ekogunea gizarte ekintzako proiektu bat da eta bere misioa da jasangarritasunaren bidean teoriatik praktikara pasatzeko lanean kontribuzio lana egitea. Haur parkea eta kanpo espazio ederra ditu. Orain, gainera, eskoletan natur espazioetarako pausoa emateko aholkularitza zerbitzua ere badute.

 

“Esaten da Euskal Herrian oso kontzientziatuta gaudela, baina falta zaigu teoriatik praktikara pausoa ematea”, azaltzen du Kutxa Ekoguneko Kakun Orbegozok. “Gure helburua da sortzea ideiak, ereduak, aliantzan udaletxeekin eta beste erakundeekin proiektuak martxan jartzeko”.

Haur parkea

Kutxa Ekoguneko haur parkea instalazio itxia eta estalia da eta 400 bat metro karratu ditu. Bertan daude neska-mutikoentzako jolas parkea, denda bat, kafetegia eta komunak. “Parkea txiki park estiloko zerbait da, baina material naturalekin eginda dago. Giro lasaia sortzea eta mugimenduzko jolasak bakarrik ez sortzea da ideia. Denok desberdinak garenez ideia da joko mota desberdinak gauzatzeko aukera ematea umeei”, azaltzen du Orbegozok. “Egurrekin egindako paisaia sortu dugu non soroak, zuhaitzak, baserri bat… irudikatzen diren. Inguruan, gainera, koloretako kutxak daude. Askotariko materialak daude barruan: oihalak, txapelak, makilak… Atera eta jolasteko daude. Jolas librea bultzatu nahi dugu, eta kuriosoa da; izan ere, umeek kutxekin jolasten dute gehienbat. Sarrera ordaindu egin behar da eta ostiral arratsaldetan eta zapatutan zein domeketan zabaltzen dugu. Azken bietan goizez eta arratsaldez”.

Helduentzako eskaintza ere badute. “Ikastaro motzak ditugu. Bertan azaltzen dugu umeek autonomia osoz jolastu behar dutela eta zein izan behar den helduen jarrera. Gero, badaude baita ere ordubeteko tailer motzak familientzako. Urtebeteko jaiak ere egiten ditugu. Eta igandetan sorpresa txikiak izaten ditugu: ipuin saioak izaten dira, gehienbat”.

Kanpo espazioa

Haur parkearen inguruan Kutxa Ekoguneak  25 hektareako kanpo espazioa du. Goiko aldean baso bat eta beheko aldean baratze parke sareko egoitza nagusia alokairuan ematen diren 161 baratze sororekin. “Baratze ekologikoak dira eta horren inguruan ikastaroak ematen dira eta furgobaratza zerbitzua ere badugu. Baratze eskola ere badugu. Oso dinamikoa den museo ireki bat da. Bertan azaltzen dugu zer nolako baratzeak ditugun, zein den gure paisaia kulturala, baratzearen inguruko guru kultura, lurra nola zaintzen den…”

Hurrengo urtean begira, gainera, 6 hektareako abeletxe bat zabaltzeko asmoa dute Kutxa Ekogunean. “Espezie autoktonoak egongo dira ikusgai, eta eskura eginak. Horretan dihardugu orain. Hainbat gauza landu nahiko genituzke proiektu honekin, hala nola, enpatia sortzea aztertzeko nola tratatzen ditugun animaliak, zer nolako elikadura mota nahi dugun… Hasi gara eskolako haurrekin saio txikiak egiten. Beranduago zabalduko dugu espazio hori publiko zabalarentzako”.

Baso eskolen eredua zabaltzen

Beste herrialde batzuetan oso zabalduta dagoen baso eskolen ildotik badute egitasmo bat Kutxa Ekogunean. “Hemen, aldiz, ez ziren ezagutzen orain dela urte gutxira arte. Gure helburua ez da soilik basoan eskola bat sortzea baizik eta haurrak geletatik ateratzea eta gure paisaian murgiltzea”, azaldu du Orbegozok. “Gure modeloa pixka bat desberdina da; izan ere gurean ezagutzen diren baso eskolak pribatuak dira eta homologatu gabekoak. Kutxa Ekoguneak ezin du eskola pribatu bat sortu horrek ez duelako gure misioarekin bat egiten. Hala, gure ideia da jadanik zabalik dauden eskoletara joatea eta laguntzea irakasleei ikasgeletatik ateratzea umeekin. Hala, batzorde tekniko bat sortu genuen eta hor goaz proiektuari forma ematen denon artean”.

Oso gustura dauden aurreko urteko esperientziak emandakoarekin eta ikasturte honetan ere jarraipena izango duela esan dute Kutxa Ekogunetik. Hala, interesatu duten eskolekin egingo dute elkarlana. “Gauza ikusgarriak gertatzen dira haurrak ikasgeletatik ateratzen dituzunean.  Hasieran ez ziren irakaslearen aldamenetik aldentzen, denbora asko pasatzen zuten zertan jolastu erabakitzen… Orain ikusten dugu nola oso denbora gutxian murgiltzen diren une horretan egin nahi duten jolasean, beraien munduan sartzen dira eta kontzentrazio maila oso handia da. Jolasten dira bertako landareekin eta animaliekin, egiten dituzte txabolak… Gauza oso politak sortzen dituzte eta ikasten dituzte. Bitartean, gu helduok ikasten ari gara behaketa ondo egiten, zaintza egiten, errespetatzen umeen denbora espazioak…”

Kutxa Ekoguneak aholkularitza ematen dugu eta eskolek erabakitzen dute zein ingurutan egin nahi duten saioa, zein maiztasunarekin, zein ordutegian…

Argazkien irudia hemen.

Kakun Orbegozori egindako elkarrizketa entzungai azpian.