Ikasturte berriarekin batera hezkuntza egitasmo ezberdinak martxan jarri dira. Erronka asko eta kolosalak  ditugula jendarte moduan eta hezkuntza dugu hauei aurre egiteko bide eta tresna nagusia. Hezkuntza ez formaletik, gozamenetik, aisialditik…  lana egiten du Txatxilipurdi elkarteak ere, eta lankide guztiak bat egiten dugun mintegi batekin eman diogu hasiera 2021-2022 ikasturteari.

Txikitik, oinak lurrean, baina utopiarantz bidea egiten jarraitzeko asmoarekin egin diogu bideari herri eta egitasmo ezberdinetako lan taldeek.

Txatxilipurdi elkarteak eta Goiena kooperatibak elkarlanean kudeatzen dugu guraso.eus egitasmoa. Gurasotasunaz, hezkuntzaz eta hazkuntzaz euskaraz hausnartzeko tresnak sortzen jarraituko dugu ikasturte honetan ere. Gurasotasun kontziente batetik ere jendartea eraldatu daitekeela uste dugu.  Arrasatetik, Euskal Komunitatera begira egiten dugun egitasmo honetan errespetuz eta guraso izateko modu guztiak onartuz, hausnarketa sustatu nahi dugu. Gai politak, korapilatsuan eta deserosoak ere jarriko ditugu mahai gainean. Gurekin bidea egin nahi baduzu saltseatu gure edukietan, eman zure iritzia edo bidali zure hausnarketak. Guk gustuz  argitaratuko ditugu eta!