Psikologoa eta psikopedagogoa da Mireia Centeno eta seme-alaben arteko zeloak nola kudeatu izan da hizpide Bergarako Txapa irratiko Gurasoak saioan. “Gatazka gehienak zeloetatik eratorriak izaten dira, eta beti daude”, azaldu du. “Oso zaila da zelorik ez egotea; izan ere, berezkoak ditugu, instintiboak eta naturalak dira. Beharrezkoak dira biziraupenerako”.

Umeen artean zenbat eta adin tarte txikiagoa izan orduan eta zelo gehiago azaltzeko aukera dagoela dio adituak. “Jakin behar dugu zeloak beti daudela, nahiz eta hasiera batean modu nabarmenean azaldu ez. Saiatu behar duguna da ahal dugun eta hoberen kudeatzen. Batzuetan oso zaila da, baina azkenean zeloak dituen ume horri laguntza eskaintzea da helburua”.

Zeloak onartu egin behar dira

Centenoren esanetan garrantzitsua da gurasook ere zeloak onartzea. “Ez ukatu, onartu eta lagundu zeloak dituen seme-alabari zeloak kudeatzen. Nola? Gaiari buruz hitz eginez. Esan behar zaio normala dela zeloak izatea, ulertzen ditugula zeloak, eta jakin behar duela beti izango gaituela ondoan”.

Adituaren esanetan zeloak dituen ume bati hobeto sentitzeko tresnak eskaini behar zaizkio, eta argi eduki behar dugu gehienetan seme-alaba nagusiengan ematen badira ere kontrakoa ere gerta daitekeela. Alegia, txikiak sentitzea zeloak. “Azken finean lehiakortasunak eragiten ditu zeloak”, esan du Centenok.

Lehiakortasuna ekidin

Gatazkak ekiditen saiatu behar dugula uste du adituak. “Horretarako etxeko dinamika edo komunikazioa landu behar dugu. Azken finean, anai-arreben artean sortzen diren gatazken oinarrian lehiakortasuna dago. Zer egin dezakegu guk lehiakortasun hori ez sustatzeko?”.

Centenoren ustez gauza asko egin ditzakegu. “Oso garrantzisua da gurasoen presentzia; hor egotea. Gaur egun, tamalez, bortizkeria fisikoa onartu egiten da batzuetan, eta baita ere haurren artean ematen denean. Lan handia egin behar da gai horrekin lotuta. Transmititu behar dugu bortizkeria ez dela normala eta ezin dela onartu. Horrelako egoerak ematen direnean esku-hartze bat egin behar dugu, eta adierazi beraien artean jotzea, esaterako, ez dagoela ondo”.