Kirol esparruan adin txikikoekin sare sozialen erabilera egokia egiteko gida egin du Digitalde enpresak, Eusko Jaurlaritzak eta hiru diputazioek bultzatuta. Gida egiten ibili den Naiara Perez de Villarrealek gaiarekin lotutako hainbat gomendio eman ditu.

Adin txikikoekin lanean ari garenean zer eta nola erabili behar ditugu sare sozialak? Kirol taldeetako arduradunentzako aholkuak ematen ditu Adingabeekin diharduten kirol erakundeetan teknologia digitalak arduraz erabiltzeko gida izeneko gidak, baina informazio interesgarria da bestelako esparruetan ari garenerako ere.

Hala, nahiz eta gida adin txikikoekin lan egiten duten kirol erakundeetako zuzendaritza taldeei, teknikariei, eta zeharka bada ere gurasoei eta adin txikikoei zuzenduta badago ere denontzako da erabilgarria.

Lege bat badago

“Oso ohikoa da Whatsapp edo Telegram taldeak egitea. Komunikatzeko modu zuzena eta azkarra eskaintzen dute, baina adin txikikoekin ari garenean hainbat gauza hartu behar ditugu kontuan eta sarri ez da horrela izaten”, ohartarazten du Digitalde enpresako Naiara Perez de Villarrealek. 14 urtetik beherako neska-mutiko baten datuak talde batean partekatzeko beharrezkoa da gurasoen baimena edukitzea, esaterako.

Hainbat kontu araututa daudela dio adituak. “Lege bat badago eta gauza asko arautzen ditu. Gidan legeak esaten duena azaltzen dugu. Badaude, ordea, legeak arautzen ez dituen beste egoera asko eta horien inguruan hausnarketa beharrezkoa dela uste dugu. Etikarekin eta zentzumenarekin zer ikusia duten gauzak dira”.

Onurak eta arriskuak

Naiara Perez de Villarrealek azaltzen du teknologia erabiltzen dugula hainbat abantaila eskaintzen dizkigulako: berehalakotasuna, komunikazio zuzena, talde kohesioa sendotu, edukiak partekatu… Baina erabilera horrek izan dezakeela bestelako eragina ere. Esaterako, argazkiak atera eta baimenik gabe partekatzea edo taldeko kideak iraintzea. Horiek delituak dira. Bestelakoen artean daude adikzioa sortzea, atseden uneak oztopatzea…

“Kontuz ibili behar da mezuak bidaltzeko ordutegiarekin. Neska-mutikoak eskolan badaude, ez bidali, eta berandu bada ere ez”, azaltzen du adituak.

Gomendatzen du sare sozial batean taldea egin beharrean egin daitekeela difusio zerrenda bat. Bestelako aholkuak ere gaineratzen ditu. “Taldea sortzen dugunean denbora hartu beharko genuke zertarako sortu dugun eta zein erabilera emango diogun azaltzeko, eta ez ahaztu moderatzailearen ardura dela talde horretan gertatzen dena ere. Beste edozein esparrutan moduan ardura eta erantzukizuna hezitzailearena da”.