Richard Louv (1949) idazle, kazetari eta dibulgatzaile estatubatuarra da. Children & Nature Network mugimenduaren bultzatzaileetako bat da eta desnaturalizazioaren eztabaida bultzatu du. Argi dio: “Gure seme-alabak eta haien seme-alabak dira historian naturarekin deskonexio handiena duten belaunaldiak”.

Bederatzi liburu idatzi ditu Louvek, azkena gaztelerara itzuli berria izan den Los últimos niños del bosque (Capitán Swing editorialean). Naturarekiko lotura ezak umeen eta helduen osasun fisikoan zein psikikoan eragiten dituen kalteak dokumentatu ditu. Natura defizit sindromea esaten dio. “Ez du medikuntza-diagnostikorik, baina oinarrian bere egiten ditu naturarekin kontakturik ez edukitzeak dakartzan ondorioak”. Louvek sormenerako eta harridurarako gaitasunen gutxiagotzea, esperientzia zuzenetatik ikasteko gaitasunaren gutxitzea eta estimulu fisikoei erantzuteko gaitasuna txikitzea nabarmentzen ditu. “Hainbat ikerketak erakutsi dute naturan egoteak hobekuntzak ekartzen dituela estres, depresio edo arreta-defizit egoeretan. Baita ere garapen kognitibo hobea. Naturarekin harreman zuzena duten neska-mutikoek, bestalde, hobeto garatzen dituzte kooperaziorako, introspekziorako zein hausnarketarako gaitasunak. Baita ere lagunartekotasuna eta parekotasuna”.

Gurasoen babesa

Arriskuak ekiditeko helburuarekin guraso askok babes neurriak hartzen dituzte seme-alabekin. “Apropos egin gabe, baina ez gara umeak etorkizunerako ondo prestatzen ari. Erori, zikindu eta naturan jolasean egiten duten neska-mutikoak prestakuntza hobea dute bizitzarako”, dio Louvek.

Eskoletan ere zer egin handia dagoela uste du adituak. “Lorategi bat, gune berdeak, baratzea, tximeletak nola polinizatzen duten ikusteko guneak… garrantzitsua da eskoletan ere horrelako espazioak egotea. Argi naturalaren presentzia soilak eragina du eskolako emaitzetan”.

Adituaren esanetan historian ez da egon naturarekin hain deskonektatuta dagoen belaunaldirik aurretik. Arrazoi nagusia teknologiaren zabaltzea dela uste du baina baita ere hirien diseinu okerra, hainbat animalia espezieren desagertzea, gurasoen beldurrak…

Teknologiarekin zer

Louek ez du debekua aldarrikatzen. “Mugikorrarekin naturan argazkiak ateratzea oso ariketa interesgarria izan daiteke”, azaltzen du. “Kontua, hemen, oreka da”, dio. “Gero eta eguneroko teknologikoagoa gero eta presentzia handiagoa behar du naturak gure bizitzan. Ekuazio bat da (…) Eskola batean diru kopuru bat bideratzen badute ordenagailu berriak erostera antzerako diru kopurua bideratu beharko lukete espazio berdeak eta natura sustatzera”.

Neska-mutikoei aldaketa klimatikoari edo kutsadurari buruz azkarregi hitz egitea ere kaltegarria izan daitekeela uste du Louvek. “Lehenengo naturaren esperientzia positiboa izan behar dute, eta zuzena”.

Argazkiaren iturria hemen.

Argibideak Richard Louv