Aretxabaletako UDA kirol elkarteak eta Arrasateko San Juan de Dios ospitaleak nerabeen artean drogen kontsumoari aurre egiteko programa jarri dute abian. Droga kontsumoak gazteengan duen eraginari buruz hausnartzeko eta irtenbideak bilatzeko abiarazi dute elkarlana.

Goiena Komunikazio Zerbitzuak kooperatibak Batekin hasten da beti erreportaje berezia egin du ospitaleko gaixoen testigantzak oinarri hartuta.

 

Aitor, Maialen eta Silvia dira protagonista nagusiak. Hirurak ere 30 urtetik beherakoak, eta hirurak ere, drogen kontsumoak eragindako buruko arazoen ondorioz San Juan de Dios ospitalean tratamendua jarraitu dutenak, edo jarraitzen dabiltzanak. Badute beste puntu bat
batera: hirurak ari dira parte hartzen Aretxabaletako UDA kirol elkarteak eta San Juan de Dios ospitaleak nerabeen artean drogen kontsumoari aurre egiteko abian jarri duten programan.

Gurasoen kezkak

“Zerk kezkatzen gaituen gurasoak? Ba, norberaren seme edo alaba horrelako egoera baten ikusteak. Espero duzun eta nahi duzun azkeneko gauza da hori. Izan ere, marra gorria igarotzen denean, ez dago atzera bueltarik… Baina marra gorri hori ikusezina da. Bakoitzarendako toki batean edo bestean egon liteke. Hor dago arriskua. Gazteek hori ezagutu behar dute. Hau erruleta errusiar bat dela eta edozein unetan pasa ahal dezakezula marra hori. Eta bizitza osorako gelditzen zara marraren bestaldean”, dio dokumentalean Unai Larrañaga gurasoak.