Bergarako Zabalotegi aretoan izan da asteon Nerea Mendizabal psikopedagogoa. Hitzaldia egin zuen Errespetuzko komunikazioa familian izenburupean.

Gurasoen eta seme-alaben arteko komunikazio egokia garatzeko hainbat gako eman zituen: inoren gainetik egongo ez den botere-harreman eredua eta gurasoek ondo adierazten eta entzuten ikasiko duten –hori dirudiena baino askoz konplexuago moduan aurkeztu zuen, hori bai– komunikatzeko era aldarrikatu zuen, besteak beste.

Marshall Rosenberg-ek aldarrikatutako komunikazio ez bortitza definitu zuen, eta azaldu zuen familia barruko harremanetan aldaketa garaiak datozela. Egoera hori aprobetxatu beharra dagoela dio.

Zer falta zaie gurasoei seme-alabekiko errespetuzko komunikazioa lortzeko? Mendizabalen esanetan falta zaiguna da gutaz hitz egitea; izan ere, gauzak ez direnean guk nahi dugun moduan joaten gehienetan besteez hitz egiten dugu. Horrekin batera garrantzitsua deritzo enpatiaz entzuten ikastea.