Bere bidea egiten ari da INSPIRA egitasmoa, eta azaroaren 27an Inspira manifestua aurkeztu zuten bultzatzaileek historiako lehen programatzailetzat jotzen den Ada Byronen heriotzaren 165. urteurrena kontuan hartuz.

INSPIRA nesken bokazio zientifikoa eta teknologikoa bultzatzeko Euskadiko proiektu berritzaile bat da, sentsibilizazio- eta orientazio-ekintzetan oinarritzen dena. Deustuko Unibertsitateak sustatzen du, Elhuyar Fundazioa eta Innobasqueren lankidetzarekin eta hiru Foru Aldundien laguntzarekin —Bizkaia, Gipuzkoa eta Araba—. Bigarren edizioa aurkeztu zuten uztailean eta oraingo honetan, 113 irakasle, 43 ikastetxe eta 1.075 ikaslek parte hartu dute.

Premiazkoa da nesken artean bokazio zientifikoa eta teknologikoa sustatzea; izan ere, urtero gutxitzen da prestakuntza teknologikoaren alorrean izena ematen duten nesken kopurua. “Espainiako unibertsitate-sistemako ikasleen % 54,3 emakumezkoak izan arren, ingeniaritza eta arkitektura teknikoko tituludunen kopurua % 54,3etik % 26,4ra jaitsi da.

Inspira handitzen

Gero eta gehiago dira Inspira egitasmora atxikitzen ari diren emakume zientzialariak eta baita ere programarekin bat egiten duten ikastetxeak.

Inspira egitasmoarekin bat egin duen ikastetxeetako bat da Bergarako Miguel Altuna Lanbide Heziketa zentroa, eta bertako irakasle da Alaitz Kristobal. Ziurtatzen du gaur egun oraindik ere zientzia eta teknologia esparruetan emakumeen presentzia  oso oso txikia dela.

 

“Muga asko daude eta era askotakoak. Estereotipoak daude, rol banaketak… Eta txiki txikitatik goaz horiek guztiak barneratzen konturatu ere egin gabe. Horri buelta ematea oso zaila da”, esan du. “Gure ikastetxean oso nabarmena da. Teknologikoak diren espezialitate batzuetan eta batez ere industriara oso bideratuak direnetan mutilak dira gehiengoa, %100 ez esatearren. Aldi berean beste esparru batzuetan kontrakoa pasatzen da. Administrazioan, esatera, denak neskak dira. Genero bereizketa itzela dago”.

Bereizketa hori zergatik ematen den galdetuta Kristobalek azaldu du ikerketa bat eskatu dutela eta Eskoziako zein Holandako erakunde erreferente batzuekin dihardutela elkarlanean azterketa hori egiteko. “Proiektu europar bat da ikusteko zein muga dauden; izan ere, behin eta berriro ematen den joera bat da. Argitu nahi dugu mugak zeintzuk diren eta zergatik ematen diren”.

Lanbide Heziketako gainerako ikastetxeek moduan ikasleen praktikak direla-eta Bergarako Miguel Altunan harreman oso estua dute inguruko enpresekin. “Esaten digutena da ez dituztela topatzen pertsona kualifikatuak beraien beharrak asetzeko. Ez neskak, ez mutilak. Behar handia dago eta aukera handiak neskentzako ere”.

Inspira manifestuaren oinarri nagusiak

1. Hausnartu eta berrikusi berdintasuna dagoelako uste faltsua. Berdintasun hori oraindik ez dela existitzen erakusten duten datuak ezagutu eta oraindik lan handia dagoela lortzeko konturatu.

2. Jendaurrean aitortu emakume eta gizonek gaitasun, eskubide eta erantzukizun berdinak ditugula eta aitormen bera merezi dugula.

3. Berdintasun falta horren ondorioak ezagutarazi eta lan egin ekimen positiboen beharraz gizartea kontzientziatzeko eta berdintasunik eza saihesteko, zientzia eta teknologia sistema arduratsua eta askotarikoa sustatuz.

4. Emakume zientifiko eta teknologoak agerian jarri, historian izan direnak eta egungoak, haien lana aitortu eta erreferente berriak eratzeko.

5. Gizarte mailako estereotipoei buelta eman, genero rolei buruzko usteak desmitifikatzeko; eta STEAM (Zientzia, Teknologia, Ingeniaritza, Artea eta Matematika) arloetako lanbideen aukera zabalaren berri emateko.

6. Neskak animatuta, gai eta aitortuak sentituko diren gizarte eta hezkuntza ingurua sortu, etorkizuna inolako mugarik gabe aukeratu ahal izan dezaten.

7. Emakumeak ahalduntzen lagundu, hori maila guztietan lortzeko ekimenak garatuz

 

[BIDEOA] Alaitz Kristobal: “Neskei esango nieke zientzia eta teknologia oso motibagarriak izan daitezkeela”

Inspira egitasmoaren inguruko informazio gehiago hemen.

Argazkiaren iturria hemen.