Guraso.eus atariko kolaboratzaile Maider Gartzia de Vicuñak modu bat eskaini digu Martxoaren 8a zer den seme-alabekin lantzeko. “Aitzakia bikaina dugu gaiari buruz hitz egiteko eta saiatu beharko ginateke gaia urte osoan lantzen”, adierazi du. “Gauza asko egin daitezke seme-alabekin beraiek ere egoera barneratzen joateko”.

Gartzia de Vicuñak uste du beste edozein gai lantzen dugun moduan landu beharko genukeela Martxoaren 8a seme-alabekin. “Gauzak beraien hizkuntzan edo hizkeran azaltzen badizkiegu eta beraien errealitatera hurbilduta umeak gai dira gauza asko ulertzeko. Uste dut aukera dugula seme-alabekin hitz egiteko Martxoaren 8ko aldarrikapenei, lanuzteari eta horien zergatiei buruz. Aukera bakarrik ez, beharra daukagula uste dut benetan lortu nahi badugu gizarte justuago bat eta berdintasunean bizi”.

Txikitatik hasi

Zortzi urte ditu Gartzia de Vicuñaren seme nagusiak. “Esan nion batzar batera joatekoa nintzela Martxoaren 8ko ekintzak prestatzen ari ginelako. Hortik abiatuta hasi ginen berbetan zer eta zergatik egin nahi dugun aldarrikapen egunean. Azkenean uste dut modu horretan etorkizun hobeago bat eraikitzen ari garela. Txikiak izanik ere neskak eta mutilak batera ibiltzen dira eta gizarte honetan, eta gai dira ikusteko ematen diren gauzak batzuk ez direla justuak. Nahi badugu gure gizartea hobetu eta gure lanak fruituak ematea txikiak direla hasi behar dugu gaia lantzen. Uste dut, gainera, hori dela gure lana guraso bezala”.

Parte hartzeko aukera asko

Emakume bakoitzak ahal edo nahi duen neurrian eta moduan hartuko du parte mobilizazioetan. “Parte hartzeko aukera guztiak daude irekita. Plantoaren filosofia da emakumeek egiten ditugun lan txiki horiek garrantzi handi dutela, izan zaintza, umeen heziketa, etxea… Badirudi ez dutela garrantzi handirik baina egiten ez direnean nabari egiten da”, azaltzen du Gartzia de Vicuñak. “Emakume batzuk aukera izango dute mobilizazioetara umerik gabe joateko baina egongo dira baita ere umerik gabe joan ezean parte hartzeko aukerarik izango ez dutenak. Saiatuko gara egoera horiek guztiak kudeatzen. Ez da inor ondo egin duzu edo gaizki egin duzu esaten hasiko”.

Gizon askok galdetu dute zein den beraien papera kontu honetan. “Askok bat egiten dute aldarrikapenekin eta ados dauden egingo diren ekintzekin eta jakin nahi dute zertan lagun dezaketen. Nire ustez egun horretan gizonen laguntza zentratu behar da antolatutako ekintzetan emakumeen parte hartzea errazten”.

Elkarrizketa entzungai: