Oporrak

Mirari Arandok idatzi zuen kolaborazio artikulu hau 2012. urtean.

Txatxilipurdiko bulegoan joan etorri ugari dago azken aldian. Manex eta Uxuen aita bere seme-alabak udaleku irekietan apuntatzera hurbildu da. Garazik Orioko kanpaldira joateko aukera izango duen jakin nahi du. Mikelen amak Askizurako apuntatu du eta Maitane, Julen eta Itsaso udaleku ibiltariaren nondik norakoa galdetzera etorri dira.

Oporretan gaudenean, normalean aisialdian egiten ditugun gauzak egiteko denbora gehiago izaten dugu; atsedena hartu, lagunekin eta familiakoekin tarte luzeagoan egon, jolastu, lagun berriak egin, hondartzara joan, leku berriak ezagutu…

Aisialdiko momentu hauek batzuetan bakarrik eta beste batzuetan seme alaba nahiz familia giroan gozatu nahi izaten ditugu. Baina nola egin guzti honi ahalik eta zuku gehien ateratzeko?

Normalean, haur eta gazteen oporrek ez daukate helduon oporrekin zerikusirik. Askotan ikasleen oporraldia langileena baino askoz luzeagoa izaten da eta guraso askok beraien seme alaben jai egunak antolatzen lan ikaragarria izaten dute. Kasu hauetan, herriko eskaintza ezberdinak uztartu, beraien haurrekin hitz egin eta norbere seme alabarentzat eskaintza erakargarriena bilatzen ahalegintzen dira.

Ikasturtea amaitzeaz bat, bertako lagunekin egoteko momentuen goxotasuna apaldu egiten da. Haur eta gazte askok ez dute oporretan elkar ikusi ezta elkar jolasten. Helduok gure lagunekin egotea gustuko dugun lez, haur eta gazteek ere horrela nahi izaten da. Hauetako askok, elkarrekin egon ahal izateko udalekuak aukeratzen dituzte maiz. Etxe giroa gustuko dutenek udaleku irekiak aukeratzen dituzte eta kanpora joan eta leku berriak ezagutzeko irrikan izaten diren horiek Udaleku itxiak. Bi aukera hauek, guztiz egokiak dira betiko lagunekin egon, lagun berriak egin, jolastu, hondartzara nahiz pistinara joan, aisialdi hezitzaile bateaz gozatu…egiteko. Eskaintza egoki eta aberasgarria benetan seme alaben oporraldia antolatzen jarduten duten guraso hauentzat!

Familia giroan oporrak bizi eta gozatzerako orduan ere, gauza bera gertatzen da. Batzuk etxe inguruan egotea nahi izaten dute eta beste batzuk ordea, nahiago izaten dute leku eta jende berria ezagutzea. Elkarrekin egoteko denbora askoz anitzagoa izaten da eta honi zukua ateratzeko elkarri entzun, hitz egin, besarkatu, elkarrekin jolastu…behar da. Gainera,momentu hauetan burutu beharreko ekintzak denen artean erabakitzeak asko gozotuko du egoera. Hona hemen elkarbizitzarako gomendiotxo batzuk:

KOMUNIKAZIOA

Saioaren gurasoa; “ Gure alabak ez du etxean ezer kontatzen. Berarekin hitz egiten ahalegintzen garenean ez du nahi izaten eta egiten dizkiogun galderak ez ditu erantzuten. ”

Saioa; “Baina nola nahi izaten dute gure gurasoek galdera zaparrada guzti horiek hotzean erantzutea? Nola kontatuko diet nire lagunen bizitza, beraiek beraiena kontatzen ez badidate?”

Zenbat bider esan edo entzun duzue guraso baten ahotik esaldi hau? Gaztetxoen gurasoen ahotik askotan entzun eta bizi izan da egoera hau. Askotan uste izaten dugu elkarren arteko komunikazioa galdera erantzunen bidezko hitz trukaketa hutsa dela. Nik neuk ordea ez dut horrela kontsideratzen. Gure seme alabei, gure sentimendu, emozio, bizitzako egoera, esperientzietaz…hitz egin behar diegu. Honela, konfiantza bat landu eta nahi dutenean beraien esperientzia gurekin elkarbanatzeko. Kontatzen duzuena, nahi duzuelako konta ezazue; ez erantzunik espero kontatukoagatik. Galderak egitea aske garen heinean erantzuteko ere aske dira eta.

AFEKTIBITATEA

Bizitzan zehar emozio ugari bizitzeko aukera izaten dugu. Batzuetan, pozik sentitzen gara, beste batzuetan triste edo harrotuta. Hauetako batzuk behin eta berriro bizi nahi izaten ditugu eta beste batzuk ordea ez ditugu hain gustuko izaten. Emozioek gure egunerokotasunean asko eragiten dute eta horregatik hauek adieraztea oso aberasgarria izaten da. Baliteke batzuetan gure haurrek emozio hauek identifikatzeko zailtasunak izaten edo adierazteko gaitasunik ez izatea. Hau lantzeko aukera izateko jolas batzuk proposatuko dizkizuet;

– Besarkada jolasa; kaxatxo batean besarkada- txartel ezberdinak sartu eta ateratzerakoan besarkada mota hori burutu behar da. Hona hemen adibide batzuk; Amaren besarkada/ besarkada txikia/ Ume baten besarkada; anai-arrebaren besarkada izan daiteke/ ogi-tarte itxurako besarkada berezia; txartela ateratzen duena erdian eta beste guztiak bere inguruan bilduko dira besarkatzeko/ besarkada eta salto egin…

– Emozioak harrapatzen; Zapia harrapatzearen jolasa da. Bi taldetan banatu eta zenbakia ozen entzutean, talde bakoitzetik bat zapia hartzera irteten da. Kasu honetan, taldekide bakoitzak zenbaki bat izan beharrean emozio bat izango du; poza, tristura, harrotasuna, amorrua… eta erdian dagoenak esaldi bat bota beharko du. Adibidez; Barre egiteko gogoa sentitzen dudanean, zer sentitzen dut?. Esaldi honekin identifikatuta sentitzen den emozioa zapiaren bila irtengo da.

Hauez gain jolas gehiago nahi izanez gero begiratu ezazue Urtxintxa eskolak duen JOLASEN LABORATEGIA liburuan.

Jarri ezazue praktikan gomendiotxo hauek eta gozatu ezazue oporrak!