Lehenengo ikasturtea amaitu berri dute Lasarte-Oriako Ostadar Inklusioko kideek. Kirol egokitua bezalako terminoak erabili beharrean inklusio hitza nabarmentzen dute. “Inklusio terminoa era askotara uler daitekeela uste dugu”, azaldu dute ekimeneko bultzatzaile nagusi Amaia Cadarsok eta Jurgi Olasagastik.

Kontzientziazioa eta baliabideak behar direla uste dute biek, eta pozik daude lehenengo ikasturteak emandakoarekin. Azaldu dute sei gaztetxok osatu dutela, aurten, entrenamenduetako nukleoa. Gazteenak zazpi urte ditu eta nagusienak hamazazpi bete ditu. Irungo, Errenteriako, Zarauzko, Donostiako, Ataungo eta Lasarte-Oriako haurrekin egin dute lan, eta asteazkenetan egin dituzte entrenamendu saioak Lasarte-Orian.

“Haurrei kirola hastapen mailan egiteko aukera eskaintzen diegu”, azaldu du Jurgi Olasagastik. “Eskola kirolaren ikuspuntutik enfokatzen ditugu entrenamendu guztiak, ahalik eta kirol gehien landuz. Helburua da umeek gaitasun ezberdinak ezagutu eta lantzea. Bide horretan, uste dugu kirol aniztasunak asko lagun dezakeela”.

Jurgi Olasagastik azaltzen du eskola kirola modu inklusibo batean jorratuko zuen atala edo kirol kluba sortzeko asmotan zirela. “Bagenekien horretarako beharra zuten zenbait haur bazeudela eta aukera ezberdinak ikusi genituen”. Azkenean, Lasarte-Oriako Ostadar SKT-n atal berria sortzeko aukera baliatu zuten. “Estrategikoki, Gipuzkoan, oso ongi kokatuta dago Lasarte-Oria. Komunikazio ona du beste herriekin, eta horrek guztiak gure atala kokatzeko gune bikaina bihurtu zuen”.

Cadarso eta Olasagasti hasita daude hurrengo urteko programazioa lantzen. “Nahiko genuke ahalik eta egutegi osoena prestatu”, azaldu dute. Egiten duten lana erakusteko Kirola Denentzat ekimena egin zuten apirilean.

Ateak zabalik

Interesa duen edonork ateak irekiak ditu Ostadar Inklusioa taldean. Harremanetan jartzeko hainbat bide daude: ostadar.inklusioa@gmail.com helbide elektronikoa edo sare sozialak; izan ere, taldeak kontuak ditu Twitter, Facebook eta Instagram sare sozialetan.

Informazioaren eta argazkiaren iturria: Txintxarri