Xirimiri, Filipo, Pantxo, Pantxineta… Algaraklown Gipuzkoa taldeko pailazoak dira. 2012an osatu zuten taldea eta gaur egun hamaika bat sudur gorrik osatzen dute. Oso dibertigarriak dira eta oso ezagunak, batez ere, Donostiako Arantzazuko Ama ospitalean. Astean bitan egiten diete bisita bertan dauden neska-mutikoei. Gehienak boluntarioak dira.

Pantxineta, noiz eta zertara joaten zarete ospitalera?

Binaka joaten gara eta astelehen arratsaldetan eta asteazken goizetan egiten diegu bisita bertan dauden neska-mutikoei. Astelehenetan hirugarren solairukoekin egoten gara, eta asteazkenetan bestelako guneetara joaten gara: operazio-gelako laguntza egiten dugu, jaioberrien gunera joaten gara, eskolara, larrialdietara… Ospitalean denbora luze egiten da eta egin beharreko egonaldia pixka bat arintzen saiatzen gara.

Zu zeu nondik nora ibiltzen zara?

Operazio-gelako laguntza egiten dut asteazken goizetan. Ospitaleko arduradunek aurretik esaten didate bertan dauden neska-mutikoak zeintzuk diren eta bisita egitera joaten naiz. Lehenengo gauza da nire burua aurkeztea. Gehienetan nahiko urduri egoten dira denak eta azaltzen diet kolore berdeko mundu batera sartuko direla laster. Dena da berdea: hormak, buruan jarriko dieten txanoa, medikuen arropak… Azaltzen diet pegatina batzuk jarriko dizkietela eta tanta batzuk. Esaten diet, baita ere, beraiekin egongo naizela. Eta denbora egin behar badugu ba abestu egiten dugu, edo kontu kontari egoten gara… Jolasean ere egiten dugu uzten digutenean.

Gurasoak ere urduri egoten dira horrelakoetan?

Bai, dena den umeekin dauden helduak ez dira beti gurasoak, baina bai gehienak urduri egoten dira. Une batetik aurrera, gainera, ezin dira umearekin batera sartu, eta gu bai horregatik gurasoek ere ondo hartzen gaituzte.

Zer esango zenieke ospitalera joan behar duten neska-mutikoei ere haien familiei?

Lasai lasai joateko. Jende oso ona dago ospitaletan. Profesional zoragarriak. Ondo dakite zertan ari diren eta gainera gu ere egoten gara. Zorte pixka bat batekin elkar ezagutzeko aukera izango dugu!

Lagun pila izango dituzu dagoeneko?

Bai horixe! Neska-mutiko pila bat, haien gurasoak… eta baita ere gure jarduera aurrera eramateko laguntza eskaintzen dizkiguten elkarte eta erakunde guztiak. Donostiako Udala, Gipuzkoako Foru Aldundia, guraso elkarteak… Amara Berriko guraso elkartean, esaterako, hainbat ekimen egin dituzte gure lana ezagutzera emateko. Umeek egindako marrazkien enkanteak, festak… Deustuko ikasleek ere laguntzen digute. Aurreko batean, Eibar futbol taldearen futbol zelaian izan ginen sudur gorriak banatzen. Errealarekin ere ekintza desberdinak egin ditugu.

Umeekin bakarrik ez zarete egoten, ezta?

Ez. Guri mundu guztiarekin egotea gustatzen zaigu. Aiton-amonen egoitzetara joatea ere asko gustatzen zaigu. Gipuzkoan osoan ibiltzen gara. Oso onak dira kantuan, dantzan, jolasean…

Nire argazki bat bidaltzen dizuet.